सप्तकोशीमा निरन्तर बढ्दैछ बहाव, तटीय क्षेत्रमा सावधानी अपनाउन आग्रह

सुनसरी । सप्तकोशी नदीमा पानीको बहाव निरन्तर बढ्दै गएपछि सुनसरी प्रहरीले नदी तटीय क्षेत्रका बासिन्दालाई उच्च सतर्कता अपनाउन आग्रह गरेको छ ।

सप्तकोशीमा आइतबार दिउँसो ४ बजेसम्म पानीको बहाव बढेर १ लाख ७६ हजार ८ सय क्यूसेक पुगेको छ । बहाव बढेसँगै कोशी ब्यारेजका २० वटा ढोका खोलिएको सुनसरी प्रहरीले जनाएको छ । दिउँसो २ बजेदेखि ४ बजेसम्म दुई घण्टाको अवधिमा मात्रै नदीको बहाव करिब १५ हजार क्यूसेकले बढेको सुनसरी प्रहरीका सूचना अधिकारी डीएसपी चन्द्रबहादुर खड्काले बताए ।

Advertisement

त्यसअघि आइतबार दिउँसो २ बजेसम्म सप्तकोशीमा पानीको बहाव १ लाख ६१ हजार क्यूसेकभन्दा बढी मापन भएको थियो । त्यसबेला कोशी ब्यारेजका १८ वटा ढोका खोलिएका थिए । दिउँसो १२ बजे भने नदीमा १ लाख ५२ हजार ६ सय ६० क्यूसेक पानीको बहाव मापन भएको थियो । त्यतिबेला ब्यारेजका १७ वटा ढोका खुला थिए । बहाव निरन्तर बढ्दै गएपछि थप ढोका खोल्दै लगिएको हो ।

सप्तकोशीमा १ लाख ५० हजार क्यूसेकसम्मको पानीको बहावलाई सामान्य मानिन्छ भने २ लाख क्यूसेकभन्दा माथि पुगेपछि खतराको संकेत मानिन्छ । पछिल्लो समय बहाव तीव्र रूपमा बढिरहेकाले नदी तटीय क्षेत्रमा जोखिम बढ्न सक्ने प्रहरीले जनाएको छ ।

सप्तकोशीका सहायक नदीहरुमा बाढी आउने क्रम सुरु भएकाले सप्तकोशीमा बहाव बढेको हो । सहायक नदीमध्ये सुनकोशीमा पछिल्लो समय बहाव उल्लेख्य रूपमा बढेको जनाइएको छ । सुनकोशीको पानीको सतह करिब डेढ मिटर बढेको जानकारी प्राप्त भएपछि नदी तटीय क्षेत्रका बासिन्दालाई सचेत गराइएको डीएसपी खड्काले बताए ।

उनका अनुसार पहाडी क्षेत्रमा निरन्तर वर्षा भइरहेकाले नदी तथा खोलामा पानीको सतह बढ्ने क्रम जारी छ । खहरे खोलाहरुमा बाढी आउन थालेपछि चतरा पुलबाट धार्मिक तीर्थस्थल वराहक्षेत्रतर्फको आवागमनसमेत रोकिएको छ । चतरा–वराहक्षेत्र सडकखण्डमा सवारीसाधन तथा मानवीय आवागमन रोकिएको प्रहरीले जनाएको छ ।

यसअघि शनिबार पनि चतरा–वराहक्षेत्र सडकखण्डमा पहिरो गएको थियो । खहरे खोलामा आएको बाढीले एउटा मोटरसाइकलसमेत बगाएको थियो । बाढीले केही तल पुर्‍याएको उक्त मोटरसाइकल पछि बाहिर निकालिएको जानकारी डीएसपी खड्काले दिए ।

पानीको बहाव निरन्तर बढिरहेको र पहाडी क्षेत्रमा वर्षा पनि जारी रहेकाले सप्तकोशी तथा आसपासका नदी एवं खोलामा थप जोखिम हुनसक्ने भन्दै प्रहरीले विशेष सावधानी अपनाउन आग्रह गरेको छ । जिल्ला प्रहरी कार्यालय सुनसरीले सार्वजनिक सूचना जारी गर्दै बराहक्षेत्र नगरपालिका र कोशी गाउँपालिकाका नदी तटीय क्षेत्रमा बसोबास गर्ने नागरिकलाई सुरक्षित स्थानमा रहन अनुरोध गरेको छ ।

प्रहरीले नदीको बहाव बढिरहेका बेला माछा मार्ने, दाउरा टिप्ने, सेल्फी खिच्ने, भिडियो बनाउनेलगायत जोखिमपूर्ण गतिविधि नगर्न पनि आग्रह गरेको छ । अनावश्यक रूपमा नदी तथा खोलाको किनारमा नजान र सम्भावित जोखिमबाट जोगिन प्रहरीले स्थानीयलाई अपिल गरेको हो ।

नदीको बहाव अझै बढ्न सक्ने सम्भावना रहेकाले स्थानीय बासिन्दालाई नदीको अवस्था र प्रहरी तथा स्थानीय प्रशासनबाट जारी हुने सूचनामा ध्यान दिन प्रहरीले आग्रह गरेको छ । नागरिकको सुरक्षा आफ्नो प्राथमिकता रहेको भन्दै प्रहरीले सम्भावित जोखिमबाट जोगिन आवश्यक सावधानी अपनाउन अनुरोध गरेको हो ।