भोटेकोशी बाढी : गम्भीर बिरामीको उद्धारका लागि हेलिकप्टर माग

रसुवा । रसुवाको कालिका गाउँपालिका–५ का वडाध्यक्ष सन्दीप पौडेलले जिबजिबे ग्रामीण अस्पतालमा उपचाररत गम्भीर हृदयाघातका बिरामीलाई तत्काल हेलिकप्टरमार्फत उद्धार गरी उच्चस्तरीय हृदयरोग केन्द्रमा लैजान सरकारसँग माग गरेका छन् ।

सामाजिक सञ्जालमार्फत वडाध्यक्ष पौडेलले बिरामीको अवस्था अत्यन्तै नाजुक रहेकाले तत्काल विशेषज्ञ उपचार आवश्यक रहेको बताएका छन् । दुर्गम भौगोलिक अवस्था तथा पर्याप्त एम्बुलेन्स र स्वास्थ्य पूर्वाधारको अभावका कारण सडकमार्गबाट बिरामीलाई लैजान कठिन रहेकाले तत्काल एयरलिफ्ट गर्नुपर्ने उनको भनाइ छ ।

Advertisement

उनले केन्द्र तथा प्रदेश सरकारसहित सम्बन्धित निकायलाई तत्काल हेलिकप्टर उद्धारको व्यवस्था गर्न आग्रह गरेका छन् । ‘बिरामी मर्नुअघि नै उद्धार गर्नुपर्छ, एक मिनेट पनि ढिला गर्नु हुँदैन,’ पौडेलले भनेका छन् ।

पौडेलले रसुवाका दुर्गम क्षेत्रमा पर्याप्त एम्बुलेन्स तथा आपत्कालीन सवारीसाधन परिचालन गर्न र जिबजिबे ग्रामीण अस्पताललाई आवश्यक जनशक्ति, उपकरण, औषधि तथा विशेषज्ञ सेवासहित तत्काल स्तरोन्नति गर्न पनि माग गरेका छन् ।

त्यस्तै, तीन दिनदेखि वैकल्पिक सडक निर्माणको माग गरिए पनि सुनुवाइ नभएको भन्दै उनले तत्काल निर्माण सुरु गर्न सरकारसँग आग्रह गरेका छन् । स्वास्थ्य आपत्कालीन अवस्थामा उद्धार, राहत तथा एयरलिफ्टका लागि स्थायी प्रणाली विकास गर्नुपर्ने उनको माग छ ।