विपद् प्रभावितका लागि सिक्किमले पठायो राहत

Share this
606shares
मुलुकी खबर
मुलुकी खबर
clock२०८३ भदौ १५, सोमबार १३:१८

काठमाडौं । नेपालका विपद् प्रभावित नागरिकका लागि भारतको सिक्किम सरकारले अत्यावश्यक राहत सामग्री तथा स्वास्थ्य सहायता उपलब्ध गराउने भएको छ ।

नेपाल र नेपाली जनताप्रति ऐक्यबद्धता जनाउँदै सिक्किमले ‘सिक्किम फर नेपाल’ अभियानअन्तर्गत राहत तथा स्वास्थ्य सामग्री नेपाल पठाएको हो । अभियानअन्तर्गत सिक्किम क्रान्तिकारी मोर्चाको विशेष टोली राहत सामग्री र स्वास्थ्य सहायता लिएर नेपालतर्फ प्रस्थान गरेको छ ।

टोलीलाई सिक्किमका मुख्यमन्त्री प्रेमसिंह गोलेले विदाइ गरेका छन् । विदाइका क्रममा मुख्यमन्त्री गोलेले विपद्का समयमा सिक्किमले अघि सारेको यो पहलले मानवीय संवेदना, करुणा र भातृत्वको भावना प्रस्तुत गरेको बताए ।

सिक्किम सरकारले विपद्को कठिन समयमा नेपालसँग ऐक्यबद्धता जनाउँदै मानवीय सहयोगको हात बढाएको जनाएको छ । संकटका बेला एकजुट भएर प्रभावित नागरिकलाई सहयोग गर्नुपर्ने भावनाका साथ अभियान सञ्चालन गरिएको बताइएको छ ।

सिक्किमले विपद्मा ज्यान गुमाएकाका परिवारप्रति समवेदना व्यक्त गर्दै घाइते तथा प्रभावित नागरिकको शीघ्र स्वास्थ्यलाभको कामना गरेको छ । साथै, नेपालले अब अघि बढाउने पुनःस्थापना तथा पुनर्निर्माणको कठिन यात्रामा आफ्नो निरन्तर ऐक्यबद्धता रहने जनाएको छ ।

तपाइको प्रतिक्रिया
© 2024 Muluki Khabar. All Rights Reserved. Design & Develop By: Indesign Media Pvt. Ltd.