अमेरिकामा सांगीतिक कार्यक्रम गरी बाढीपीडितका लागि २१ लाख सहयोग

काठमाडौं । लोकप्रिय सांगीतिक समूह कन्दराले अमेरिकाको एट्लान्टामा आयोजित कन्सर्टबाट संकलित रकम प्रधानमन्त्री दैवी प्रकोप उद्धार कोषमा जम्मा गरेको छ । कन्सर्टबाट संकलित रकम भोटेकोशी बाढीपीडितको राहतका लागि प्रदान गरिएको गायक विवेक श्रेष्ठले जानकारी दिए ।

कन्दराले कन्सर्टबाट करिब २१ लाख रुपैयाँ प्रधानमन्त्री दैवी प्रकोप उद्धार कोषमा सहयोग गरेको हो । कन्सर्ट सकिएलगत्तै ब्यान्डका तर्फबाट गायक श्रेष्ठले प्रधानमन्त्री कोषको क्यूआरमार्फत उक्त रकम ट्रान्सफर गरेका थिए ।

Advertisement

भोटेकोशी बाढीको घटनापछि कन्दराले एट्लान्टा कन्सर्टलाई ‘ट्रिब्यूट कन्सर्ट’का रूपमा परिवर्तन गरेको थियो । पूर्वनिर्धारित कन्सर्टलाई ‘शोकलाई शक्तिमा, संगीतलाई सेवामा’ भन्ने भावनासहित राहत तथा सहयोग अभियानमा परिणत गर्ने निर्णय ब्यान्डले गरेको हो ।

यतिबेला कन्दरा आफ्नो ‘रिदम अफ चेन्ज’ टूरअन्तर्गत अमेरिकामा छ । एट्लान्टापछि ब्यान्डले भर्जिनिया र कोलोराडोको डेनभरमा प्रस्तुति दिने तयारी गरेको छ । गायक विवेक श्रेष्ठले देशप्रतिको सांगीतिक तथा सामाजिक उत्तरदायित्व सम्झँदै बाढीपीडितको पीडामा मल्हम लगाउने प्रयास गरिएको बताए ।