भोटेकोशी बाढी : ५०१ यातायात मजदुर बेपत्ता, ५४४ सवारीमा क्षति

काठमाडौं । भोटेकोशी बाढीपछि ५०१ जना यातायात मजदुर सम्पर्कविहीन भएका छन् । ५४४ वटा मालबाहक तथा सार्वजनिक सवारीसाधनमा क्षति पुगेको प्रारम्भिक विवरण सार्वजनिक भएको छ ।

नेपाल यातायात स्वतन्त्र मजदुर संगठनका अध्यक्ष भीम ज्वाला राईका अनुसार एक जना श्रमिकको मृत्यु पुष्टि भएको छ भने १७ जना सम्पर्कमा आएका छन् । उनले करिब ५६३ जना श्रमिक बाढीबाट प्रभावित भएको जानकारी दिए ।

Advertisement

संगठनले सदस्यहरूको परिवार र सम्बन्धित रुटसम्म पुगेर विवरण संकलन गरिएको जनाएको छ । बेपत्ता श्रमिकको खोजी तथा उद्धारका लागि टोली परिचालन गरिए पनि अपेक्षित प्रगति हुन नसकेको राईले बताए ।

युनिट्राभका अध्यक्ष सुमनप्रसाद पराजुलीका अनुसार पर्यटन क्षेत्रमा कार्यरत ९३ जना सदस्यसमेत सम्पर्कविहीन छन् । नेपाल यातायात मजदुर संघका अध्यक्ष धर्मराज भण्डारीले बाढी प्रभावित यातायात मजदुरको अवस्था भयावह रहेको भन्दै खोजी तथा उद्धारमा सबै पक्ष एकजुट हुनुपर्ने बताए ।

यसैबीच अन्तर्राष्ट्रिय यातायात मजदुर महासंघ (आईटीएफ)ले प्रभावित श्रमिकको खोजी, उद्धार, राहत र पुनःस्थापनाका लागि नेपालका यातायात मजदुर संगठन तथा सरकारसँग समन्वय गर्ने जनाएको छ । आईटीएफ वर्ल्ड कमिटीका उपाध्यक्ष स्कट म्याक्डनिले तत्काल आवश्यक योजना बनाएर सहयोग र समन्वय अघि बढाउन दक्षिण एसियाका सहायक सचिव अब्दुलगानी सेराङलाई निर्देशन दिएका छन् ।