सगरमाथा आधार शिविरमा मानवीय गतिविधिले हिउँ पग्लने क्रम बढ्दो

Share this
760shares
मुलुकी खबर
मुलुकी खबर
clock२०८३ भदौ १६, मंगलबार १४:०३

विराटनगर । सगरमाथा आधार शिविरमा बढ्दो मानवीय गतिविधिका कारण एक आरोहण सिजनमा करिब २५ सय टन हिउँ तथा हिमनदीको बरफ पग्लिन सक्ने एक अध्ययनले देखाएको छ ।

अध्ययनअनुसार खाना पकाउन, टेन्ट तताउन र विद्युत् उत्पादन गर्न प्रयोग हुने इन्धनसँगै आरोही तथा सहयोगीहरूले गर्ने गतिविधिबाट उत्पन्न तापले खुम्बु हिमनदीमा थप असर पारिरहेको छ । यसमध्ये मानव पिसाबबाट आउने तापले मात्रै एक सिजनमा करिब १५४ टन बरफ पगाल्न सक्ने अनुमान गरिएको छ ।

सगरमाथा आधार शिविरमा आरोहणको मुख्य समयमा हजारौँ आरोही, गाइड र सहयोगी कर्मचारी बस्छन्। सन् २०२३ को करिब ५० दिनको आरोहण सिजनमा त्यहाँ करिब १ हजार ६ सय टेन्ट सञ्चालनमा रहेका थिए ।

त्यस अवधिमा खाना पकाउन, टेन्ट तताउन तथा विद्युत् उत्पादनका लागि ८२४ सिलिन्डर एलपी ग्यास, १८ हजार ९३५ लिटर मट्टितेल र ५ हजार १३० लिटर पेट्रोल प्रयोग भएको अध्ययनमा उल्लेख छ। यी सबैबाट उत्पन्न तापलाई जोड्दा करिब ८ लाख ४९ हजार १७४ मेगाजुल ऊर्जा उत्पादन भएको र त्यसले करिब २ हजार ४९२ टन हिउँ तथा बरफ पगाल्न सक्ने अनुसन्धानकर्ताको अनुमान छ ।

अध्ययनको चासोको अर्को विषय मानव पिसाब हो। उच्च उचाइमा शरीरमा पानीको कमी नहोस् भनेर आरोहीहरूले धेरै पानी पिउने भएकाले आधार शिविरमा दैनिक ६ हजार लिटरभन्दा बढी पिसाब उत्पादन हुने अनुमान गरिएको छ ।

ठोस फोहोर संकलन गरेर आधार शिविरबाट तल लैजाने व्यवस्था भए पनि ठूलो मात्रामा पिसाब भने सिधै हिमनदीमा जाने गरेको अध्ययनले देखाएको छ । त्यसबाट आउने तापले मात्रै एक सिजनमा करिब १५४ टन बरफ पगाल्न सक्ने अनुसन्धानकर्ताले बताएका छन् ।

अध्ययनका अनुसार सगरमाथा आधार शिविरमा मानवीय गतिविधिका कारण उत्पन्न हुने वास्तविक तापको प्रभाव अझ बढी हुन सक्छ । अनुसन्धानमा हेलिकप्टर, आरोहीको शरीरबाट निस्कने ताप तथा सामान ओसार्ने याकलगायतका स्रोतको तापलाई समावेश गरिएको छैन ।

अनुसन्धानकर्ताले भने सगरमाथाका हिमनदी पग्लिनुको मुख्य कारण विश्वव्यापी जलवायु परिवर्तन नै भएको स्पष्ट पारेका छन् । आधार शिविरमा हुने मानवीय गतिविधिले त्यसमा स्थानीयस्तरमा थप दबाब सिर्जना गरिरहेको उनीहरूको भनाइ छ ।

सन् १९९१ देखि २०२३ सम्मका भूउपग्रह तस्बिर अध्ययन गर्दा आधार शिविर आसपासको सतहको तापक्रम प्रतिवर्ष औसत ०.२८ डिग्री सेल्सियसका दरले बढेको पाइएको छ । यो खुम्बु हिमनदीको आसपासको हिउँले ढाकिएको क्षेत्रको तापक्रम वृद्धिको तुलनामा करिब दोब्बर हो ।

अनुसन्धानकर्ताले सगरमाथा आधार शिविरलाई हिमनदीमाथिबाट हटाएर स्थिर र बरफरहित जमिनमा सार्ने सम्भावनाबारे पनि सुझाव दिएका छन् । यसले खुम्बु हिमनदीमाथिको मानवीय दबाब घटाउनुका साथै आधार शिविरको दीर्घकालीन सुरक्षामा पनि सहयोग पुग्ने उनीहरूको भनाइ छ ।

(‘द न्युयोर्क टाइम्स’ लगायत अन्तर्राष्ट्रिय सञ्चारमाध्यममा प्रकाशित सामग्रीका आधारमा तयार पारिएको रिपोर्ट)

तपाइको प्रतिक्रिया
मोरङमा ठूला चाडपर्व शान्तिपूर्ण, २१९ आपराधिक घटना
 एनपिएलको तेस्रो संस्करण कात्तिक ९ देखि
फाइनल पुग्न लुम्बिनी र सुदूरपश्चिमबीच निर्णायक भिडन्त
प्रधानमन्त्री बालेनको भारत भ्रमण : दिल्लीमा छोटो बसाइ, नेपालका एजेन्डा लामै
विराटनगरबाट लागुऔषधसहित एक युवक पक्राउ
ब्राउन सुगरसहित इटहरीका दुई युवक पक्राउ
कोशी प्रदेशमा एकै दिन १७ सवारी दुर्घटना, २३ जना घाइते (पूरा विवरणसहित)
बराहक्षेत्रमा चलिरहेको मोटरसाइकलबाट खसेकी युवतीको उपचारका क्रममा मृत्यु
कोशी र गण्डकीका हिमाली क्षेत्रमा वर्षा र हिमपातको सम्भावना
स्थानीय निर्वाचनको तयारीमा एमाले, ३ हजार ४१४ नेता–कार्यकर्तासहितको राष्ट्रिय भेला
यस्तो छ विदेशी मुद्राको विनिमय दर
यस्तो छ विदेशी मुद्राको विनिमयदर
पटकाको बारुद चुलोमा हाल्दा जलेर सुनसरीका बालक घाइते
© 2024 Muluki Khabar. All Rights Reserved. Design & Develop By: Indesign Media Pvt. Ltd.