भोटेकोशी बाढीपछि कोशी प्रदेशका १६० जनाको अवस्था अज्ञात

Share this
644shares
मुलुकी खबर
मुलुकी खबर
clock२०८३ भदौ १६, मंगलबार १९:११

विराटनगर । भोटेकोशी बाढीपछि कोशी प्रदेशका विभिन्न जिल्लाका १ सय ६० जना सम्पर्कविहीन भएका छन् । बाढी प्रभावित क्षेत्रमा पुगेका बेला भदौ १० गतेदेखि सम्पर्कविहीन भएकाहरूको अवस्था हालसम्म अज्ञात रहेको प्रहरीले जनाएको छ ।

कोशी प्रदेश प्रहरीका अनुसार सबैभन्दा बढी सोलुखुम्बुका ४२ जना सम्पर्कविहीन छन् । सोलुखुम्बुका तीन जना भने परिवार तथा आफन्तको सम्पर्कमा आइसकेका छन् ।

ओखलढुंगाका २६ जना सम्पर्कविहीन छन् । त्यहाँ तीन जनाको उद्धार गरिएको छ भने १० जना परिवार तथा आफन्तको सम्पर्कमा आइसकेका छन् ।

मोरङका १८ जना र सुनसरीका १६ जना सम्पर्कविहीन भएका छन् । सुनसरीका पाँच जना भने सम्पर्कमा आइसकेका छन् । उदयपुरका १६ जना सम्पर्कविहीन छन् भने पाँच जना सम्पर्कमा आएका छन् ।

झापाका १३ जना सम्पर्कविहीन भएका छन् भने एक जनाको उद्धार गरिएको छ । खोटाङका १० जना सम्पर्कविहीन छन् भने एक जना सम्पर्कमा आएका छन् ।

इलामका नौ जना सम्पर्कविहीन भएका छन् । एक जनाको उद्धार गरिएको, एक जना उपचाररत रहेको र एक जना मृत फेला परेको प्रहरीले जनाएको छ ।

संखुवासभा र भोजपुरका तीन–तीन जना तथा ताप्लेजुङ र धनकुटाका दुई–दुई जना सम्पर्कविहीन भएका छन् । ताप्लेजुङका तीन जना भने सम्पर्कमा आइसकेका छन् । पाँचथरका एक जना सम्पर्कविहीन रहेको प्रहरीले जनाएको छ ।

कोशी प्रदेश प्रहरीका प्रवक्ता एसएसपी योगेन्द्रसिंह थापाका अनुसार विभिन्न जिल्लाबाट काम तथा भ्रमणको सिलसिलामा भोटेकोशी क्षेत्र पुगेकामध्ये बाढीपछि १ सय ६० जना सम्पर्कविहीन भएका हुन् । बाढी प्रभावितमध्ये पाँच जनाको उद्धार गरिएको छ भने २७ जना परिवार तथा आफन्तको सम्पर्कमा आइसकेका छन् ।

कोशी प्रदेशका एक जना उपचाररत रहेको र एक जना मृत फेला परेको जानकारी पनि एसएसपी थापाले दिएका छन् । बाढीपछि विभिन्न जिल्लामा बेपत्ता तथा प्रभावितहरूको खोजी र उद्धारको काम जारी रहेको प्रहरीले जनाएको छ ।

तपाइको प्रतिक्रिया
© 2024 Muluki Khabar. All Rights Reserved. Design & Develop By: Indesign Media Pvt. Ltd.