२०८३ भाद्र १७, बुधबार १३:०१
काठमाडौं । नागढुंगा पातले वन क्षेत्रमा सडक भासिएपछि प्रभावित भएको काठमाडौं–मुग्लिन सडकखण्डमा सवारी आवागमन सहज बनाउन सुरुङमार्ग खुला गरिएको छ ।
काठमाडौं हुँदै मुग्लिनतर्फ जाने सवारी साधनमध्ये पेट्रोलियम पदार्थ बोकेका र दुई पांग्रे सवारी साधनबाहेक अन्य सवारीलाई नागढुंगा सुरुङमार्गबाट सञ्चालन गर्न अनुमति दिइएको हो । सडक भासिएको स्थानमा भने पेट्रोलियम पदार्थ बोकेका सवारी र मोटरसाइकललाई एकतर्फी रूपमा आवतजावतको व्यवस्था मिलाइएको सडक विभागले जनाएको छ ।
यसबाट सडक अवरुद्ध हुँदा सिर्जना भएको सवारी चाप केही सहज हुने अपेक्षा गरिएको छ । विभागका अनुसार भासिएको सडकको तत्काल मर्मत सुरु गरिने छैन । पहिले प्राविधिक टोलीबाट स्थलगत अध्ययन गरी सडक भासिनुको कारण र क्षतिको अवस्था मूल्यांकन गरिनेछ ।
प्राविधिक अध्ययनपछि आवश्यक मर्मत तथा पुनर्निर्माणको काम अघि बढाइने विभागले जनाएको छ । सडक पूर्ण रूपमा सुरक्षित बनेपछि मात्रै सबै सवारीका लागि नियमित आवागमन खुला गर्ने तयारी छ ।
इमेल: [email protected]
ठेगाना: विराटनगर–२
मोबाइल नं. : ९८१९३३६४१६, ९८५२०५१७६५, ९८०७०१४०८१
कम्पनी रजिष्ट्रार दर्ता नं. : ३५०५५२–८१/८२
सूचना विभाग दर्ता नं. : ४६८३–२०८१/२०८२
सम्पादक : किशोर बुढाथोकी
×