भोटेकोशी बाढीः थप १५५ नेपाली चीनबाट तातोपानी नाका हुँदै फर्किए

काठमाडौं । रसुवाको भोटेकोशी बाढीका कारण चीनतर्फ फसेका थप १५५ जना नेपाली आज (शुक्रबार) तातोपानी नाका हुँदै नेपाल फर्किएका छन् । चिनियाँ पक्षले राहदानी नम्बरलगायत विवरणसहित उनीहरूलाई तातोपानी नाकाको लिपिङ क्षेत्रमा ल्याएर नेपाली अधिकारीको जिम्मा लगाएको हो । ल्हासास्थित नेपाली महावाणिज्य दूतावासको सहयोगमा उनीहरू नेपाल फर्किएका हुन् ।

भोटेकोशी बाढीबाट प्रभावित क्षेत्रमा परेर चीनतर्फ सुरक्षित रहेका नेपालीलाई चिनियाँ पक्षले तातोपानी नाका हुँदै नेपाल पठाएको हो । अहिले तातोपानी भन्सार बन्द रहे पनि पर्यटकको आवतजावतका लागि नाका खुला रहेको छ । ल्हासास्थित नेपाली महावाणिज्य दूतावासका अनुसार अस्थायी पास लिएर केरुङ पुगेका नेपालीलाई नेपाल फर्काइएको हो ।

Advertisement

यसअघि बिहीबार ११४ जना नेपाली तातोपानी नाका हुँदै स्वदेश फर्किएका थिए । भोटेकोशी बाढीपछि अस्थायी पास लिएर केरुङ पुगेका नेपाली त्यहाँ अलपत्र परेका थिए । नेपाली महावाणिज्यदूतका अनुसार केरुङमा करिब १ हजार ६०० नेपाली रहेको अनुमान छ। तीमध्ये नेपाल फर्किन ८०० जनाले नाम टिपाएका छन् ।

भोटेकोशी नदीमा आएको बाढीका कारण रसुवा क्षेत्रमा रहेका नेपाली नागरिक प्रभावित भएका छन् । केही नागरिक अझै सम्पर्कविहीन छन् भने चीनतर्फ सुरक्षित रहेका नेपालीलाई स्वदेश फर्काउने प्रक्रिया जारी रहेको छ ।