बाढी र पहिरोले विभिन्न राजमार्ग प्रभावित

काठमाडौं । लगातारको वर्षासँगै आएको बाढी र पहिरोका कारण देशका विभिन्न मुख्य राजमार्ग तथा सडकखण्डमा यातायात प्रभावित भएको छ ।

नेपाल प्रहरीले सार्वजनिक गरेको पछिल्लो विवरणअनुसार कतिपय सडकखण्ड पूर्ण रूपमा अवरुद्ध छन् भने केही स्थानमा एकतर्फी तथा सीमित सवारीसाधन मात्र सञ्चालन भइरहेका छन् । काठमाडौंको चन्द्रागिरि नगरपालिका–२ विसामढीमा पहिरोका कारण काठमाडौं–धादिङ सडकखण्ड प्रभावित भएको छ । भदौ १७ गते बिहानबाट प्रभावित उक्त सडकमा हाल एकतर्फी रूपमा यातायात सञ्चालन भइरहेको छ ।

Advertisement

काभ्रेको बीपी राजमार्गअन्तर्गत खुर्कोट–नेपालथोक–कटुञ्जेबेँसी खण्डमा सम्भावित बाढीको जोखिमका कारण सवारी सञ्चालनमा समय र तौलसम्बन्धी व्यवस्था गरिएको छ । शुक्रबार साँझ ७ बजेदेखि बिहान ४ बजेसम्म १० टनसम्मका मालवाहक सवारीसाधन सञ्चालन गर्न दिइएको छ । बिहान ४ बजेदेखि साँझ ७ बजेसम्म भने परिस्थितिको मूल्यांकन गरी सवारीसाधन सञ्चालन गरिने व्यवस्था मिलाइएको छ ।

बाढीका कारण रसुवाको उत्तरगया गाउँपालिका–५ खाल्टेस्थित त्रिशूली–मेलुङ–स्याफ्रुबेँसी सडकखण्ड पूर्ण रूपमा अवरुद्ध छ । उक्त अवरोध लामो समयसम्म रहने प्रहरीले जनाएको छ ।

त्यस्तै, भदौ १० गतेबाट रसुवाका मुख्य राजमार्गहरू बाढीका कारण पूर्ण रूपमा अवरुद्ध छन् । तत्काल ती सडक सञ्चालनमा आउन नसक्ने अवस्था रहेको जनाइएको छ ।

नुवाकोटको टोखा–छहरे सडकखण्डमा सम्भावित बाढी तथा पहिरोका कारण रातिको समयमा सवारी सञ्चालनमा रोक लगाइएको छ । शिवपुरी गाउँपालिका–चन्द्रखोला क्षेत्रमा राति १० बजेदेखि अर्को सूचना नभएसम्म बिहान ५ बजेसम्म सडक बन्द गर्ने व्यवस्था गरिएको थियो ।

नुवाकोटको बेत्रावती सिमटारमा बाढीका कारण पासाङ ल्हामु सडकखण्ड भदौ १० गते बिहानदेखि पूर्ण रूपमा अवरुद्ध छ । अर्को सूचना नभएसम्म उक्त सडक सञ्चालनमा नआउने प्रहरीले जनाएको छ ।

धादिङको पृथ्वीलोकमार्गअन्तर्गत बेनिघाट रोराङ गाउँपालिका–७ कृष्णभीरमा पहिरो खसेपछि सडक पूर्ण रूपमा अवरुद्ध भएको छ । ठूलो पहिरोका कारण उक्त स्थानमा यातायात सञ्चालन हुन सकेको छैन ।

सोही राजमार्गको गजुरी गाउँपालिका–२ पेवाभीरमा पनि पहिरोका कारण सडक प्रभावित छ । उक्त खण्डमा हाल साना गाडी मात्र एक लेनबाट सञ्चालन भइरहेका छन् ।

धादिङकै बेनिघाट रोराङ गाउँपालिका–१० ज्वाङखोला र थाक्रे गाउँपालिका–२ कुम्रेभीर क्षेत्रमा पनि पृथ्वीलोकमार्ग पहिरोका कारण प्रभावित भएको छ । उक्त सडकखण्डमा हाल एकतर्फी रूपमा सवारी सञ्चालन भइरहेको छ ।

यस्तै, म्याग्दीको बेनी–जोमसोम सडकखण्ड, मुगुको मुगु–गमगढी सडक, बझाङको जयपृथ्वी राजमार्ग र अर्घाखाँचीको सालझण्डी–ढोरपाटन सडकखण्ड पनि पहिरोका कारण पूर्ण रूपमा अवरुद्ध भएका छन् । रोल्पाको सहिद मार्गअन्तर्गत दुईखोली र भालखोर क्षेत्रमा पहिरो जाँदा सवारीसाधन सञ्चालन हुन सकेका छैनन् ।

प्रहरीले बाढी, पहिरो तथा प्रतिकूल मौसमका कारण सडकको अवस्था जुनसुकै बेला थप जोखिमपूर्ण हुन सक्ने भएकाले अत्यन्त जरुरी कामबाहेक यात्रा नगर्न सर्वसाधारणलाई आग्रह गरेको छ । यात्रा गर्नैपर्ने अवस्था भए सम्बन्धित सडकको पछिल्लो अवस्था बुझेर मात्र यात्रा गर्न प्रहरीले अनुरोध गरेको छ ।