अमेरिकी दूतावासको ट्राभल एडभाइजरी : रसुवागढी-टिमुरे क्षेत्र ‘लेभल–४’मा

काठमाडौं । अमेरिकी दूतावासले नेपाल भ्रमणसम्बन्धी नयाँ ट्राभल एडभाइजरी जारी गर्दै प्राकृतिक विपद्को जोखिमका कारण नेपाललाई ‘लेभल-२’ अर्थात् बढी सावधानी अपनाउनुपर्ने मुलुकका रूपमा राखेको छ । रसुवाको रसुवागढी–टिमुरे–स्याफ्रुबेँसी क्षेत्र तथा नेपाल-चीन सीमा नाकालाई भने ‘लेभल-४’ अर्थात् भ्रमण नगर्नुपर्ने क्षेत्रका रूपमा तोकिएको छ ।

एडभाइजरीमा अगस्ट २६ मा आएको ठूलो बाढी तथा पहिरोका कारण रसुवाको उत्तरी क्षेत्रमा यातायात र सञ्चार सेवा प्रभावित भएको उल्लेख गरिएको छ । प्रभावित क्षेत्रमा अझै खोज तथा उद्धार, सडक तथा पूर्वाधार मर्मत र पुनःस्थापनाको काम जारी रहेकाले थप बाढी र पहिरोको जोखिम कायमै रहेको दूतावासले जनाएको छ ।

Advertisement

दूतावासले अमेरिकी नागरिकलाई भोटेकोशी, त्रिशूली र नारायणी नदी आसपासका क्षेत्र, नदी किनार, होचा भूभाग, क्षतिग्रस्त पुल तथा अस्थिर भिरालो क्षेत्रमा विशेष सावधानी अपनाउन आग्रह गरेको छ । विपद् प्रभावित क्षेत्रमा हराइरहेका व्यक्तिको खोजी वा अन्य कुनै उद्देश्यले स्वतन्त्र रूपमा प्रवेश नगर्नसमेत चेतावनी दिइएको छ । उद्धार तथा खोजी कार्यमा संलग्न सुरक्षा निकाय र सम्बन्धित सरकारी संयन्त्रलाई अवरोध पुग्न सक्ने भएकाले जोखिमयुक्त क्षेत्रमा अनावश्यक यात्रा नगर्न दूतावासले आग्रह गरेको हो ।

नेपाल भूकम्प, बाढी र पहिरोजस्ता प्राकृतिक विपद्को जोखिममा रहने मुलुक भएकाले यात्राका क्रममा स्थानीय प्रशासन तथा सम्बन्धित निकायले जारी गर्ने सूचना र निर्देशन पालना गर्न पनि अमेरिकी नागरिकलाई सुझाव दिइएको छ । विशेषगरी मनसुनका बेला भारी वर्षासँगै आकस्मिक बाढी र पहिरो आउन सक्ने भएकाले यात्रा योजना बनाउँदा सडक तथा मौसमको अवस्थाबारे जानकारी लिन भनिएको छ ।

दूतावासले नेपालमा स्वास्थ्य तथा आपत्कालीन सेवाको क्षमता कतिपय क्षेत्रमा सीमित हुन सक्ने उल्लेख गर्दै आवश्यक औषधि साथमा राख्न, यात्रा स्वास्थ्य बीमा गर्न तथा चिकित्सकीय उद्धारसमेत समेटिएको बीमा लिन सुझाव दिएको छ ।