पुनःस्थापनाका लागि स्रोतको कमी हुन नदिने प्रधानमन्त्रीको प्रतिबद्धता

काठमाडौं । प्रधानमन्त्री बालेन (बालेन्द्र) शाहले रसुवाको भोटेकोशी नदीमा आएको बाढीपछिको पुनःस्थापना तथा पुनर्निर्माणका लागि स्रोतको कुनै पनि कमी हुन नदिने प्रतिबद्धता व्यक्त गरेका छन् । बाढी प्रभावित क्षेत्रका जनप्रतिनिधिसँग आज (सोमबार) प्रधानमन्त्री तथा मन्त्रिपरिषद् कार्यालयमा भएको छलफलमा प्रधानमन्त्री शाहले आन्तरिक स्रोतका साथै दातृ निकायबाट प्राप्त सहयोग परिचालन गरी व्यवस्थापन गरिने बताए । भेटघाटले प्रभावित क्षेत्रको वास्तविक वस्तुस्थिति बुझ्न र जनप्रतिनिधिको मनोबल उच्च राख्न सहयोग पुगेको उनले उल्लेख गरे ।

तीन तहका सरकारबीचको समन्वयको प्रशंसा गर्दै प्रधानमन्त्री शाहले विपद्का बेला सङ्घ, प्रदेश र स्थानीय सरकार एकै ठाउँमा उभिएर काम गरेकोमा खुसी व्यक्त गरे । प्रभावित क्षेत्रमा जतिसक्दो चाँडो सडक सञ्जाल पुनःस्थापना गर्ने कार्य भइरहेको र सडक खुलाएसँगै जनजीवन पूर्ववत् अवस्थामा फर्किने उनले बताए ।

Advertisement

भोटेकोशी नदी तटीय क्षेत्रमा अब पुनः बस्ती बसाउन सम्भव नभएकाले नजिकैको सुरक्षित स्थानमा वैज्ञानिक बस्ती व्यवस्थापन गरिने प्रधानमन्त्रीको भनाइ छ । प्रभावितहरूको रोजगारी, शिक्षा, स्वास्थ्य र संस्कृतिलाई ध्यानमा राख्दै नयाँ बस्ती निर्माण गरिने भएकाले स्थानीय जनप्रतिनिधिलाई आफैँ उपयुक्त जग्गाको पहिचान गरी सिफारिस गर्न उनले आग्रह गरे ।

प्रेस तथा अनुसन्धान विज्ञ दीपा दाहालका अनुसार छलफलमा गृहमन्त्री सुदन गुरुङ, पूर्वाधार विकासमन्त्री सुनिल लम्साल, सूचना तथा सञ्चारमन्त्री डा. विक्रम तिमिल्सिना, सांसद अच्युतम लामिछानेसहित रसुवा, नुवाकोट, धादिङ, तनहुँ र गोरखाका प्रभावित पालिका प्रमुख तथा अध्यक्षहरूको उपस्थिति थियो ।