फुटबल स्टार मेसी अन्तिमपटक अर्जेन्टिनाको जर्सीमा मैदान उत्रने

एजेन्सी । अर्जेन्टिनाका स्टार फुटबलर लियोनल मेसीलाई अक्टोबरमा बेनिनविरुद्ध हुने मैत्रीपूर्ण खेलका लागि राष्ट्रिय टोलीमा समावेश गरिएको छ। उक्त खेल अर्जेन्टिनाका लागि मेसीको अन्तिम अन्तर्राष्ट्रिय खेल हुने अपेक्षा गरिएको छ। अर्जेन्टिना फुटबल संघका अध्यक्ष क्लाउडियो तापियाका अनुसार मेसीलाई राष्ट्रिय टोलीबाट औपचारिक बिदाइ दिन अक्टोबर ६ मा घरेलु मैदानमा खेल आयोजना गरिने भएको हो।

खेल ब्युनस आयर्सस्थित ८५ हजार दर्शक क्षमताको एस्टाडियो मोनुमेन्टलमा हुनेछ। सन् २०२२ को विश्वकप जितेको अर्जेन्टिनाको टोलीका सदस्यहरूलाई समेत उक्त खेलमा सहभागी हुन निम्तो दिइएको छ। तापियाले मेसी अर्जेन्टिनाको राष्ट्रिय टोलीका प्रतीक र कप्तान भएकाले उनलाई विशेष बिदाइ दिन खेल आयोजना गर्न लागिएको बताएका छन्।

Advertisement

३९ वर्षीय मेसीले अर्जेन्टिनालाई सन् २०२२ को विश्वकपको उपाधि दिलाएका थिए। उनी अर्जेन्टिनाका सर्वाधिक गोलकर्ता तथा सर्वाधिक अन्तर्राष्ट्रिय खेल खेल्ने खेलाडी हुन्। उनले राष्ट्रिय टोलीबाट २०७ खेलमा १२५ गोल गरेका छन्। मेसी हाल अमेरिकी क्लब इन्टर मियामीबाट व्यावसायिक फुटबल खेलिरहेका छन्। आठ पटकका बालोन डी’ओर विजेता मेसीले राष्ट्रिय टोलीबाट आफूले सक्दो योगदान गरिसकेको र अब दिन बाँकी केही नरहेको बताएका थिए।

अर्जेन्टिनाले सेप्टेम्बर ३० मा कोर्डोबामा बोलिभिया तथा अक्टोबर ३ मा ब्युनस आयर्समा बुर्किना फासोसँग मैत्रीपूर्ण खेल खेल्ने तालिका छ। त्यसपछि अक्टोबर ६ मा बेनिनविरुद्ध हुने खेलमा मेसीलाई मैदानमा उतार्ने तयारी गरिएको हो। यसैबीच, विश्वकप फाइनलपछि मैदानमा भएको झडपमा संलग्न भएको भन्दै अर्जेन्टिनाका मिडफिल्डर लिएन्ड्रो पाराडेसलाई १० खेल तथा नाहुएल मोलिनालाई ७ खेलको प्रतिबन्ध लगाइएको छ। त्यसकारण उनीहरू बेनिनविरुद्धको खेलमा उपलब्ध नहुने अपेक्षा गरिएको छ।

अर्जेन्टिनामाथि विश्वकपका क्रममा अनुशासनसम्बन्धी विभिन्न उल्लंघनका कारण घरेलु मैदानमा हुने दुई खेल ५० प्रतिशत क्षमतामा खेलाउने सजायसमेत सुनाइएको थियो। तीमध्ये एउटा खेलको सजाय स्थगित गरिएको थियो। विश्वकपका क्रममा गैरखेल गतिविधिका प्रदर्शन, टोलीको अनुशासन उल्लंघन तथा समर्थकबाट भेदभावपूर्ण नारा र हाउभाउ भएको आरोपमा अर्जेन्टिनामाथि कारबाही गरिएको थियो।