मोरङमा पक्राउ परेका राजनीतिक विश्लेषक भरत दाहाललाई काठमाडौं पठाइयो

विराटनगर । राजनीतिक विश्लेषक तथा त्रिमूल नेपालका अध्यक्ष भरत दाहाल (भरतमणि दाहाल)लाई मोरङको सुन्दरहरैँचाबाट पक्राउ गरी काठमाडौं पठाइएको छ ।

दाङको साविक नारायणपुर गाविस घर भएका ६५ वर्षीय दाहाललाई विद्युतीय कारोबार ऐनअन्तर्गतको कसुरमा अनुसन्धानका लागि आइतबार पक्राउ गरेर काठमाडौं पठाइएको हो । मोरङ प्रहरी प्रमुख एसपी कवित कटवालका अनुसार काठमाडौं जिल्ला अदालतबाट असोज २ गते पक्राउ पुर्जी जारी भएसँगै साइबर ब्युरोको आग्रहमा दाहाललाई सुन्दरहरैँचाबाट नियन्त्रणमा लिइएको हो ।

Advertisement

प्रहरीले पक्राउ गरेपछि आइतबार साँझ ५ः१० बजेतिर बुद्ध एयरको विमानमार्फत विराटनगर विमानस्थल हुँदै उनलाई काठमाडौं पठाएको हो । एसपी कटवालका अनुसार दाहालविरुद्ध मोरङमा भने कुनै उजुरी परेको छैन । काठमाडौंमा साइबर ब्युरोले उनीमाथि आवश्यक अनुसन्धान गर्नेछ ।

दाहाल राजनीतिक छलफल तथा कार्यक्रममा सहभागी हुन असोज २ गते पूर्व आएका थिए । शनिबारको कार्यक्रम सकेर आइतबार काठमाडौं फर्किने तयारीमा रहेका उनलाई सुन्दरहरैँचा नगरपालिका–८ सलकपुरस्थित चिया पसलबाट प्रहरीले पक्राउ गरेको हो ।

प्रहरी स्रोतका अनुसार दाहालमाथि अमेरिकी सञ्चारमाध्यम ‘ग्रे जोन’ले नेपालमा भएको जेनजी आन्दोलनका बारेमा सार्वजनिक गरेको रिपोर्ट सामाजिक सञ्जालमार्फत फैलाएको विषयमा अनुसन्धान अघि बढाउने तयारी छ । दाहालले सेप्टेम्बर १२ अर्थात् भदौ २७ गते ‘अमेरिकी पत्रिकामा अर्को विस्फोट’ शीर्षक राखेर ग्रे जोनको रिपोर्ट सामाजिक सञ्जालमा सेयर गरेका थिए ।

उक्त रिपोर्टमा नेपालका केही नयाँ राजनीतिक नेतृत्व, अभियन्ता तथा प्रमुख व्यक्तित्वसँग अमेरिकी सहयोगमा सञ्चालित विभिन्न संस्था तथा परियोजनाको सम्बन्ध रहेको दाबी गरिएको थियो । रिपोर्टमा केही चर्चित तथा नयाँ राजनीतिक व्यक्ति र आन्दोलनका अगुवाको नाम नागरिक नेतृत्व तथा क्षमता विकाससम्बन्धी कार्यक्रमसँग जोडिएको विवरणसमेत उल्लेख गरिएको थियो ।

दाहालले उक्त सामग्री सेयर गर्नुअघि पनि सरकार तथा समसामयिक राजनीतिक घटनाक्रमका बारेमा सामाजिक सञ्जालमार्फत निरन्तर टिप्पणी गर्दै आएका थिए । पछिल्लो समय उनले विशेषगरी बालेन्द्र (बालेन) शाह नेतृत्वको सरकारका विषयमा आलोचनात्मक धारणा सार्वजनिक गर्दै आएका थिए ।

साइबर ब्युरोका प्रवक्ता एसपी दिलिपकुमार गिरीका अनुसार सामाजिक सञ्जालमा भ्रम एवं अतिरञ्जनापूर्ण प्रस्तुति गरिएको विषयमा दाहालमाथि अनुसन्धान अघि बढाइने छ ।

यता दाहालका सहकर्मी तथा उनीसम्बद्ध पक्षले भने पक्राउलाई राजनीतिक विचार र सत्ता तथा शासन व्यवस्थामाथि प्रश्न उठाउँदै आएको आवाजमाथिको धरपकडका रूपमा व्याख्या गरेका छन् । उनीहरूले पछिल्लो राजनीतिक घटनाक्रमपछि राज्य संयन्त्रको दुरुपयोग भइरहेको आरोप लगाउँदै राजनीतिक विचार व्यक्त गर्ने नागरिकमाथि दमन गरिएको दाबी गरेका छन् ।

प्रहरीले भने दाहाललाई विद्युतीय कारोबार ऐनअन्तर्गतको कसुरमा अदालतबाट जारी पक्राउ पुर्जीका आधारमा नियन्त्रणमा लिइएको जनाएको छ । अब काठमाडौंमा साइबर ब्युरोले उनीमाथिको अनुसन्धान अघि बढाउनेछ ।

विश्लेषक भरत दाहाल सुन्दरहरैँचाबाट पक्राउ, काठमाडौं पठाइँदै