एमाले बैठकमा नेतृत्वको कार्यशैलीमाथि प्रश्न, पुनर्गठन कार्यदलको प्रतिवेदन माग

काठमाडौं । नेकपा (एमाले)को केन्द्रीय कमिटी बैठकमा पार्टीको आन्तरिक कार्यशैली, निर्णय प्रक्रिया र संगठन सञ्चालन पद्धतिमाथि प्रश्न उठ्न थालेको छ । ललितपुरको रामबाघ महलमा जारी बैठकमा बोल्ने अधिकांश केन्द्रीय सदस्यले पार्टी पुनर्गठन कार्यदलको प्रतिवेदन बैठकमा पेस गरी त्यसैका आधारमा छलफल अघि बढाउन माग गरेका छन् ।

बैठकमा अग्नी खरेल, आनन्द पोखरेल, कर्ण थापा, किरण गुरुङ, अफिलाल उखेडा, उर्मिला सुनुवार, एकलाल श्रेष्ठ र आरसी लामिछानेसहितका केन्द्रीय सदस्यले आफ्नो धारणा राखिसकेका छन् । बैठकमा धारणा राख्ने क्रममा नेताहरूले पार्टीभित्र संस्थागत निर्णय प्रक्रियाभन्दा व्यक्तिकेन्द्रित निर्णयको प्रवृत्ति बढ्दै गएको भन्दै त्यसमा सुधार आवश्यक रहेको बताएका छन् ।

Advertisement

केन्द्रीय सदस्य अग्नी खरेलले विधान महाधिवेशनमा पर्याप्त छलफल हुन नसक्नु पार्टीको कमजोरी भएको बताएका छन् । जनभावनाअनुसार पार्टी अघि बढ्न नसकेको उल्लेख गर्दै उनले पार्टी पुनर्गठनको आवश्यकता औँल्याएका छन् ।

अन्य सदस्यहरूले पनि नेतृत्व तहबाट विधि र पद्धतिभन्दा व्यक्तिगत निर्णय हावी हुन थालेको भन्दै असन्तुष्टि जनाएका छन् । उनीहरूले यस्ता प्रवृत्तिले पार्टी संगठन कमजोर बनाउँदै गएको र कार्यकर्ताको मनोबलमा समेत असर परेको बताए ।

बैठकमा पार्टीभित्र देखिएका अस्वस्थ आचरण र परम्परागत कार्यशैलीमा परिवर्तन आवश्यक रहेको विषय पनि उठेको छ । नेतृत्वको व्यवहार र कार्यशैलीमा सुधार गर्दै कार्यकर्ताको भावना तथा जनअपेक्षालाई पार्टीको निर्णय प्रक्रियासँग जोड्नुपर्नेमा नेताहरूले जोड दिएका छन् ।

विधान महाधिवेशनमा पर्याप्त रूपमा जनभावना र तल्लो तहका कार्यकर्ताका अपेक्षा समेट्न नसकिएको विषयलाई समेत नेताहरूले बैठकमा उठाएका छन् । उनीहरूले अब संगठनको संरचना, कार्यशैली र निर्णय प्रक्रियामा सुधार गर्दै समग्र पुनर्गठनतर्फ अघि बढ्नुपर्ने बताएका छन् ।

पार्टीभित्र विधि, पद्धति र आन्तरिक लोकतन्त्रलाई बलियो बनाउनुपर्ने आवाज बैठकमा उठिरहेको छ । पुनर्गठन कार्यदलको प्रतिवेदनमाथि छलफल गरी त्यसका आधारमा आगामी रणनीति तय गर्नुपर्ने मागसमेत नेताहरूले गरेका छन् ।

केन्द्रीय कमिटी बैठकमा सदस्यहरूले धारणा राख्ने क्रम जारी छ । त्यसअघि पदाधिकारीका तर्फबाट विष्णु पौडेल र शंकर पोखरेलले मात्र बैठकमा आफ्नो धारणा राखेका थिए ।