कोशी नदीमा बहाव बढ्यो, ब्यारेजका २४ ढोका खोलिए

Share this
767shares
मुलुकी खबर
मुलुकी खबर
clock२०८३ असोज ९, शुक्रबार १२:५२

सुनसरी । पूर्वी पहाडी तथा तराईका जिल्लामा लगातार भइरहेको वर्षाका कारण कोशी नदीमा पानीको बहाव तीव्र रूपमा बढेको छ। शुक्रबार बिहान ९ः१५ बजेको मापनअनुसार कोशी ब्यारेजमा पानीको बहाव प्रतिसेकेन्ड १ लाख ९० हजार ६८० क्युसेक पुगेको जिल्ला प्रहरी कार्यालय सुनसरीका सहायक सूचना अधिकारी होम ओलीले जानकारी दिए।

पानीको बहाव बढेपछि ब्यारेजका ५६ वटा ढोकामध्ये २४ वटा खोलिएका छन्। उच्च बहावका कारण ब्यारेजमा खतराको सङ्केतस्वरूप रातो बत्ती बालिएको छ भने रातो झण्डासमेत फहराइएको कोशी ब्यारेज कन्ट्रोल रुमले जनाएको छ। नदीमा पानीको बहाव अझै बढ्न सक्ने अनुमान गरिएको छ। त्यसलाई ध्यानमा राख्दै जलस्तरको निरन्तर अनुगमन भइरहेको छ।

बहाव बढेसँगै तटीय क्षेत्र तथा जोखिमयुक्त बस्तीका बासिन्दालाई उच्च सतर्कता अपनाउन सुनसरीका प्रमुख जिल्ला अधिकारी ईश्वरीप्रसाद अर्यालले आग्रह गरेका छन्। जल तथा मौसम विज्ञान विभागले असोज ११ गतेसम्म कोशी प्रदेशका विभिन्न स्थानमा मेघगर्जन, चट्याङ र हावाहुरीसहित वर्षाको सम्भावना रहेको जनाएको छ।

तपाइको प्रतिक्रिया
© 2024 Muluki Khabar. All Rights Reserved. Design & Develop By: Indesign Media Pvt. Ltd.