विराटनगरमा फुटपाथमै प्रभु बैंकको स्कार्पियो, पैदलयात्री सडकमा हिँड्न बाध्य

विराटनगर । चाडपर्वको मुखमा विराटनगरको जलजलाचोकस्थित प्रभु बैंकअगाडि फुटपाथमै बैंकको स्कार्पियो गाडी पार्किङ गरिँदा पैदलयात्रीलाई सास्ती भएको छ ।

दिनहुँ हजारौँ मानिसको आवतजावत हुने जलजलाचोक क्षेत्रमा पैदलयात्रीका लागि छुट्याइएको फुटपाथमै प्रदेश ३–०१–०२३ प २६०८ नम्बरको गाडी राखिएपछि सर्वसाधारण मुख्य सडकबाट हिँड्न बाध्य भएका छन् । फुटपाथ अवरुद्ध हुँदा पैदलयात्रीको आवागमनमा समस्या हुनुका साथै दुर्घटनाको जोखिमसमेत बढेको छ ।

पैदलयात्री सहज र सुरक्षित रूपमा हिँड्नका लागि बनाइएको फुटपाथमै सवारीसाधन राखिएपछि सार्वजनिक सडकको प्रयोग र व्यवस्थापनमाथि प्रश्न उठेको छ । बैंकअगाडि ट्राफिक प्रहरीको उपस्थिति हुँदासमेत फुटपाथमा गाडी पार्किङ गरिनुले सडक व्यवस्थापनमा जिम्मेवार निकायको भूमिकामाथि पनि प्रश्न खडा गरेको छ ।

चाडपर्वका बेला बजार क्षेत्रमा मानिसको चाप बढ्ने भएकाले पैदलयात्रीको सुरक्षामा विशेष ध्यान दिनुपर्ने हुन्छ । तर, फुटपाथमै गाडी राखिँदा पैदलयात्री सवारीसाधन गुड्ने सडकमा हिँड्नुपर्ने अवस्था बनेको छ । यसले दुर्घटनाको जोखिम बढाउनुका साथै सर्वसाधारणको सहज आवागमनमा समेत बाधा पुर्‍याएको छ ।

जलजलाचोकमा प्रभु बैंकअगाडि देखिएको दृश्यले फुटपाथ पैदलयात्रीका लागि हो कि सवारीसाधन पार्किङका लागि भन्ने प्रश्न उठाएको छ । सम्बन्धित ट्राफिक प्रहरी र बैंक प्रशासनले यस विषयमा ध्यान दिई फुटपाथमा हुने पार्किङ हटाएर पैदलयात्रीको आवागमन सहज र सुरक्षित बनाउन आवश्यक रहेको स्थानीय बताउँछन् ।