दसैँपछि ओरालो लाग्यो नेप्से

काठमाडौं । दसैँअघि सात कारोबार दिनसम्म निरन्तर उकालो लागेको सेयर बजारमा चाडपछिको पहिलो दिन गिरावट आएको छ । सोमबार नेप्से परिसूचक ४.३४ अंकले घटेर २ हजार ६२९ अंकमा झरेको हो ।

बजारमा अधिकांश कम्पनीको सेयर मूल्य घट्दा कारोबार रकमसमेत खुम्चिएको छ । अघिल्लो कारोबारमा ४ अर्ब ८८ करोड रुपैयाँको सेयर किनबेच भएकोमा सोमबार ४ अर्ब रुपैयाँमा सीमित भयो ।

कुल २७६ कम्पनीमध्ये १७१ वटाको सेयर मूल्य घट्दा ९९ वटाको बढेको छ । ६ कम्पनीको मूल्यमा भने परिवर्तन भएन ।

समग्र बजार ओरालो लागे पनि उत्पादन तथा प्रशोधन र व्यापार समूहमा लगानीकर्ताको आकर्षण देखियो । उत्पादन तथा प्रशोधन समूह १.०३ प्रतिशत र व्यापार समूह १.११ प्रतिशतले बढेका छन् । सिमेन्ट कम्पनीको सेयर मूल्यमा आएको वृद्धिले उत्पादन तथा प्रशोधन समूहलाई टेवा दिएको छ । व्यापार समूहमा विशाल बजार कम्पनीको मूल्य १.४१ प्रतिशत बढेको छ ।

सोमबार बेनी हाइड्रोपावरको सेयर मूल्य सबैभन्दा धेरै १५ प्रतिशतले बढेको छ । माथिल्लो मैलुङखोला जलविद्युत् कम्पनीको ५.८१, सोनापुर सिमेन्टको ५.०७, सगरमाथा जलविद्युत् कम्पनीको ४.७२ र घोराही सिमेन्टको ४।४७ प्रतिशतले मूल्य बढेको छ ।

यसको विपरीत चिरख्वा हाइड्रोपावरको सेयर मूल्य सबैभन्दा धेरै ७.९२ प्रतिशतले घटेको छ । महिला लघुवित्तको ७.५७, गुराँस लघुवित्तको ५.८१ र एसियन हाइड्रोपावरको ४.३४ प्रतिशतले मूल्य घटेको छ ।

कारोबार रकमका आधारमा घलेम्दी हाइड्रोपावर, शिवम् सिमेन्ट, माउन्टेन इनर्जी, ग्रिन भेन्चर्स, हिमालयन डिस्टिलरी, अपि पावर, सानिमा बैंक र सानिमा मिडिल तमोर अगाडि रहे ।

दसैँअघि देखिएको निरन्तर वृद्धिपछि बजारमा आएको यो गिरावटसँगै लगानीकर्ताको गतिविधि उत्पादनमूलक कम्पनी र व्यापार समूहमा बढी केन्द्रित देखिएको छ ।