‘अर्णव’ चक्रवातः कुन प्रदेशमा कस्तो प्रभाव ?

काठमाडौं । नेपालमा बिहीबारदेखि मौसम बदली भई देशका विभिन्न स्थानमा वर्षा र हिमपात हुने सम्भावना छ। जल तथा मौसम विज्ञान विभागको मौसम पूर्वानुमान महाशाखाले बिहीबारदेखि शनिबारसम्म मेघगर्जन र चट्याङसहित मध्यमदेखि धेरै भारी वर्षा तथा हिमपात हुन सक्ने भन्दै सतर्कता अपनाउन आग्रह गरेको छ ।

महाशाखाले आज (मंगलबार) बिहान जारी गरेको मौसम पूर्वानुमान बुलेटिनअनुसार हाल देशमा पश्चिमी वायुको आंशिक प्रभाव छ । हाल हिमाली तथा पहाडी भूभागमा मौसम मुख्यतया सफा रहे पनि तराई, उपत्यका र खोंचका केही स्थानमा बिहान हुस्सु तथा कुहिरो लागेको छ ।

मंगलबार दिउँसो कोशी, मधेश र बागमती प्रदेशमा आंशिक बदली हुने तथा देशका बाँकी भूभागमा मौसम मुख्यतया सफा रहनेछ। राति भने देशभर आंशिक बदली हुने पूर्वानुमान छ ।

बुधबार देशभर साधारणतया बदली रहनेछ । हिमाली भूभागका एक–दुई स्थानमा हल्कादेखि मध्यम वर्षा तथा हिमपातको सम्भावना रहेको महाशाखाले जनाएको छ । बुधबार राति हिमाली क्षेत्रका थोरै स्थानमा मध्यम वर्षा तथा हिमपात हुन सक्नेछ । कोशी र बागमती प्रदेशका पहाडी भूभाग, मधेश प्रदेश तथा कोशी प्रदेशको तराईका एक–दुई स्थानमा पनि मध्यम वर्षा हुन सक्ने अनुमान छ ।

बिहीबारदेखि भने मौसम थप प्रभावित हुने देखिएको छ । कोशी, मधेश, बागमती र गण्डकी प्रदेशलगायत कर्णाली तथा सुदूरपश्चिम प्रदेशका हिमाली भूभागमा बदली रहनेछ । यी प्रदेशका विभिन्न स्थानमा वर्षा तथा हिमपातको सम्भावना छ । बिहीबार राति कोशी, मधेश, बागमती, गण्डकी र लुम्बिनी प्रदेशका धेरै स्थान तथा कर्णाली र सुदूरपश्चिम प्रदेशका केही स्थानमा मेघगर्जन र चट्याङसहित मध्यम वर्षा तथा हिमपात हुन सक्ने महाशाखाले जनाएको छ ।

बिहीबार राति कोशी, बागमती र गण्डकी प्रदेशका हिमाली तथा पहाडी भूभागका एक–दुई स्थानमा भारी वर्षा तथा हिमपात हुन सक्नेछ । लुम्बिनी प्रदेशको पहाडी तथा तराई भूभागका एक–दुई स्थानमा पनि भारी वर्षाको सम्भावना छ ।

शुक्रबार र शनिबार देशभर अधिकांश बदली रहने अनुमान गरिएको छ । यी दुई दिन कोशी, मधेश, बागमती, गण्डकी र लुम्बिनी प्रदेशका अधिकांश स्थान तथा कर्णाली र सुदूरपश्चिम प्रदेशका विभिन्न स्थानमा मेघगर्जन र चट्याङसहित मध्यम वर्षा तथा हिमपात हुन सक्नेछ ।

शुक्रबार कोशी, मधेश, बागमती, गण्डकी र लुम्बिनी प्रदेशका केही स्थान तथा कर्णाली र सुदूरपश्चिम प्रदेशका हिमाली र पहाडी भूभागका एक–दुई स्थानमा भारी वर्षा तथा हिमपातको सम्भावना छ । कोशी, बागमती, गण्डकी र लुम्बिनी प्रदेशका एक–दुई स्थानमा धेरै भारी वर्षा तथा हिमपातसमेत हुन सक्ने महाशाखाले जनाएको छ ।

शनिबार पनि कोशी, मधेश, बागमती, गण्डकी र लुम्बिनी प्रदेशका केही स्थानमा भारीदेखि धेरै भारी वर्षा तथा हिमपात हुन सक्ने पूर्वानुमान छ । कर्णाली र सुदूरपश्चिम प्रदेशका हिमाली तथा पहाडी भूभागका एक–दुई स्थानमा भारी वर्षा तथा हिमपातको सम्भावना रहेको छ ।

महाशाखाले बिहीबारदेखि शनिबारसम्मको सम्भावित वर्षा तथा हिमपातलाई ध्यानमा राख्दै धानबाली भित्र्याउनेलगायत कृषि कार्य बिहीबारअघि नै सम्पन्न गर्न आग्रह गरेको छ । उच्च पहाडी तथा हिमाली क्षेत्रमा भारी हिमपात, हिमआँधी र हिमपहिरोको जोखिम हुन सक्ने भएकाले पर्यटकलाई उच्च हिमाली क्षेत्रमा नजान तथा उक्त अवधिमा त्यहाँ रहेका पर्यटकलाई सुरक्षित स्थानमा रहन अनुरोध गरिएको छ ।

वर्षाका कारण चिसो बढ्न सक्ने, जोखिमयुक्त स्थान तथा सडकछेउमा पहिरो जान सक्ने र सडक तथा हवाई यातायातसहित दैनिक जनजीवन प्रभावित हुन सक्ने भएकाले आवश्यक सतर्कता अपनाउन र पूर्वतयारी गर्न महाशाखाले सर्वसाधारण तथा सम्बन्धित निकायलाई आग्रह गरेको छ ।