अनशनरत डा. केसीसँग वार्ता गर्न समिति गठन

काठमाडौं । चिकित्सा शिक्षा सुधारको माग राख्दै अनशनमा बसेका प्रा. डा. गोविन्द केसीसँग वार्ता गर्न सरकारले समिति गठन गरेको छ ।

केसीका माग सम्बोधन गर्ने विषयमा संवाद अघि बढाउन शिक्षा मन्त्रालयका सहसचिव जयराम अधिकारीको संयोजकत्वमा बुधबार वार्ता समिति बनाइएको हो । समितिमा स्वास्थ्य तथा खाद्य स्वच्छता मन्त्रालयका सहसचिव, चिकित्सा शिक्षा आयोगका सदस्य सचिव र शिक्षा मन्त्रालयका एक उपसचिव सदस्य छन् ।

चिकित्सा शिक्षा आयोगले आवश्यक पूर्वाधार र कानुनी मापदण्ड पूरा नगरेका संस्थालाई एमबीबीएसलगायतका शैक्षिक कार्यक्रम सञ्चालन गर्न अनुमति दिएको तथा सिट संख्या बढाउने निर्णय गरेको भन्दै डा. केसीले विरोध जनाउँदै आएका छन् । उनले आयोगको उक्त निर्णय तत्काल खारेज गर्नुपर्ने मागसहित अनशन थालेका हुन् ।

डा. केसीले चिकित्सा शिक्षा आयोगका उपाध्यक्ष तथा मेडिकल विश्वविद्यालयका पदाधिकारीहरूको निर्णय प्रक्रियामा स्वार्थको द्वन्द्व देखिएको आरोपसमेत लगाएका छन् । चिकित्सा शिक्षाको गुणस्तर र नियमनसँग जोडिएका विषयमा आयोगको निर्णयमाथि प्रश्न उठाउँदै आएका केसीले आफ्ना माग पूरा नभएसम्म आन्दोलन जारी राख्ने अडान लिएका छन् ।

सरकारले वार्ता समिति गठन गरेसँगै केसीका माग सम्बोधन गर्ने विषयमा संवादको बाटो खुलेको छ ।