केराबारीमा महिलाको मृत्यु प्रकरण : श्रीमान अनुसन्धानको दायरामा, उपचारका लागि धरान पठाइयो

विराटनगर । मोरङको केराबारी गाउँपालिका–२ फैबामा अर्धनग्न अवस्थामा मृत फेला परेकी महिलाको मृत्यु प्रकरणमा प्रहरीले उनका श्रीमानलाई अनुसन्धानको दायरामा ल्याएको छ ।

३१ वर्षीया पार्वती लिम्बूको शव घरबाट करिब एक किलोमिटर टाढा जंगलमा फेला परेपछि प्रहरीले उनका श्रीमान ३५ वर्षीय पूर्णबहादुर लिम्बूमाथि अनुसन्धान अघि बढाएको हो । प्रहरीका अनुसार पूर्णबहादुर रगत बान्ता गरिरहेको अवस्थामा घरमै फेला परेका थिए । उनलाई नियन्त्रणमा लिएर आफन्तको जिम्मा लगाउँदै उपचारका लागि धरानस्थित बीपी कोइराला स्वास्थ्य विज्ञान प्रतिष्ठान पठाइएको मोरङ प्रहरीका सूचना अधिकारी डीएसपी सन्तोष श्रेष्ठले बताए ।

उनका अनुसार श्रीमान र श्रीमतीबीच पटकपटक विवाद र झैझगडा हुने गरेको जानकारी स्थानीयबाट प्राप्त भएपछि श्रीमानलाई अनुसन्धानको दायरामा ल्याइएको हो । तत्काल हेर्दा घटना शंकास्पद नदेखिएको उनले बताए । दुवै जनाले अत्यधिक मदिरा सेवन गर्ने गरेको जानकारी प्रहरीलाई प्राप्त भएको छ ।

बिहीबार साँझ स्थानीयले जंगलमा घोप्टो परेको अवस्थामा महिलाको शव देखेपछि प्रहरीलाई खबर गरेका थिए । शवको कम्मरभन्दा तलको भागमा कपडा थिएन । कपडा घटनास्थलमै फेला परेको प्रहरीले जनाएको छ । शरीरमा बाहिरी चोटपटक भने देखिएको छैन ।

घटनास्थल पुगेका फरेन्सिक चिकित्सकले मदिरा सेवनपछि बेहोस अवस्थामा कपडा खोलेको हुनसक्ने आशंका गरेका छन् । यद्यपि, यो प्रारम्भिक आशंका मात्रै भएकाले मृत्युको वास्तविक कारण पोस्टमार्टम रिपोर्टपछि मात्रै यकिन हुने डीएसपी श्रेष्ठले बताए ।

‘श्रीमान–श्रीमतीले नै अत्यधिक मदिरा सेवन र बारम्बार झैझगडा गर्ने गरेको जानकारीमा आएको छ । श्रीमती जंगलमा अर्धनग्न अवस्थामा मृत फेला परेपछि श्रीमानलाई अनुसन्धानको दायरामा ल्याइएको हो । तर, तत्कालका लागि घटना शंकास्पद देखिएको छैन । पोस्टमार्टम रिपोर्टबाट मृत्युको कारण यकिन हुन्छ,’ डीएसपी श्रेष्ठले भने ।

शवलाई पोस्टमार्टमका लागि बीपी कोइराला स्वास्थ्य विज्ञान प्रतिष्ठान धरान पठाइएको छ । पोस्टमार्टम रिपोर्ट र थप अनुसन्धानबाट महिलाको मृत्युको कारण तथा घटनाको वास्तविकता खुल्ने प्रहरीले जनाएको छ ।

मोरङको केराबारीमा अर्धनग्न अवस्थामा महिलाको शव फेला