रुखबाट खसेर मृत्यु

खाँदबारी । संखुवासभामा घाँस काट्ने क्रममा रुखबाट खसेर एक जनाको मृत्यु भएको छ ।

सभापोखरी गाउँपालिका–२ देउराली हुत्तिखिमका ६० वर्षीय लेकबहादुर लिम्बूको शुक्रबार दिउँसो चिउरीको रुखबाट खसेर मृत्यु भएको हो । घाँस काट्न रुखमा चढेका लिम्बू अचानक तल खसेका थिए । गम्भीर चोट लागेका उनको घटनास्थलमै मृत्यु भएको जिल्ला प्रहरी कार्यालयले जनाएको छ ।

आफन्तले प्रहरीलाई घटनाको जानकारी गराएपछि प्रहरी टोली पुगेको थियो । मृतकको शव परीक्षणका लागि जिल्ला अस्पताल खाँदबारी ल्याइएको इन्स्पेक्टर धीरज राईले जानकारी दिए । उनले घटनाको थप अनुसन्धान भइरहेको बताए ।