प्रधानमन्त्रीको भारत भ्रमणमा व्यापार र ऊर्जा प्राथमिकतामा

Share this
658shares
मुलुकी खबर
मुलुकी खबर
clock२०८३ मंसिर ४, शुक्रबार १५:५८

काठमाडौं । प्रधानमन्त्री बालेन्द्र (बालेन) शाहको आगामी आइतबारदेखि हुने दुईदिने भारतको राजकीय भ्रमणका क्रममा द्विपक्षीय व्यापार, पारवहन, लगानी, ऊर्जा, सम्पर्क सञ्जाल तथा पूर्वाधार विकासलगायतका विषयले प्राथमिकता पाउने भएका छन् ।

प्रधानमन्त्री शाहको भारत भ्रमणबारे जानकारी दिन शुक्रबार परराष्ट्र मन्त्रालयमा आयोजित पत्रकार सम्मेलनमा मन्त्रालयका सचिव अमृतबहादुर राईले आपसी सहयोग र सहकार्यका साथै विकास निर्माण तथा आर्थिक गतिविधिसम्बन्धी विषयलाई प्राथमिकता दिइने बताए ।

सचिव राईका अनुसार औपचारिक भ्रमणका अवसरमा दुई देशबीच सम्पर्क सञ्जाल विस्तार तथा ऊर्जा सहकार्यसँग सम्बन्धित सम्पन्न विभिन्न परियोजनाको उद्घाटन र नयाँ परियोजनाको शिलान्यास गर्ने कार्यक्रम छ ।

त्यसैगरी शिक्षा, स्वास्थ्य, कृषि, खेलकुद, विपद् व्यवस्थापन र मानव संसाधन विकासलगायतका क्षेत्रमा सहकार्यसम्बन्धी समझदारीपत्र आदानप्रदान गरिने उनले जानकारी दिए । यसबाट दुवै देशका प्राथमिकताप्राप्त क्षेत्रमा आपसी सहकार्य थप विस्तार हुने विश्वास गरिएको छ ।

नेपालमा भारतीय लगानी आकर्षित गर्ने उद्देश्यले नेपाल–भारत बिजनेस फोरम पनि आयोजना गरिने भएको छ । फोरममा भारतीय व्यवसायीका चासो र सरोकार सम्बोधन गर्ने प्रयास गरिनेछ । साथै उनीहरूलाई नेपालमा लगानी गर्न आग्रह गरिनेछ । कार्यक्रममा भारतीय लगानी थप आकर्षित गर्न अवलम्बन गरिएका नीतिगत दृष्टिकोण तथा प्रयासबारे पनि जानकारी गराइनेछ । यसले नेपाली र भारतीय व्यवसायीबीच सहकार्यको सेतुको काम गर्ने अपेक्षा गरिएको छ ।

प्रधानमन्त्री शाहको राजकीय भ्रमणमा नेपालको निजी क्षेत्रको पनि प्रतिनिधित्व हुनेछ । निजी क्षेत्रका उद्यमी तथा व्यवसायी सम्मिलित ५२ सदस्यीय टोली आफ्नै खर्चमा भ्रमण दलमा सहभागी हुने भएको छ ।

प्रधानमन्त्री शाहले मङ्सिर ७ गते सोमबार भारतका राष्ट्रपति द्रौपदी मुर्मुसँग शिष्टाचार भेट गर्ने कार्यक्रम छ । सोही दिन उनले भारतीय समकक्षी नरेन्द्र मोदीसँग प्रतिनिधिमण्डलस्तरीय वार्ता गर्ने परराष्ट्र मन्त्रालयले जनाएको छ ।

आइतबार प्रधानमन्त्री शाहसँग भारतीय विदेशमन्त्री डा. एस जयशङ्करले शिष्टाचार भेट गर्ने कार्यक्रम छ । सोही दिन प्रधानमन्त्री शाहले नयाँदिल्लीस्थित राजघाटमा रहेको महात्मा गान्धीको समाधिस्थलमा श्रद्धासुमन अर्पण गर्नेछन् ।

प्रधानमन्त्री शाह नेतृत्वको प्रतिनिधिमण्डलमा अर्थमन्त्री डा. स्वर्णिम वाग्ले, परराष्ट्रमन्त्री शिशिर खनाल, प्रधानमन्त्रीका मुख्य सल्लाहकार कुमार बेन्जनकार, राजनीतिक सल्लाहकारसहित उच्चपदस्थ अधिकारी, व्यवसायी र पत्रकार गरी ३४ सदस्य रहने परराष्ट्र मन्त्रालयले जनाएको छ ।

तपाइको प्रतिक्रिया
विराटनगरका २ हजार २५७ परिवारले पाउँदैछन् ‘गरिब परिचयपत्र’
हाटखोला श्मशान घाटको व्यवस्थापन सुधार्न महानगरको चासो
भारत भ्रमणको तयारीमा प्रधानमन्त्री शाह, रविसँग तीन घण्टा छलफल
दोस्रो झापा महिला गोल्डकपको तयारी पूरा, शनिबारदेखि खेल सुरु
मेची–महाकाली पदयात्रामा रहेका सांसद अमरेश सिंहलाई विराटनगरमा कालो झन्डा
विराटनगरको उखुबारीमा युवकको शव : घरमै आएर हत्याको धम्की, तीन दिनपछि मृत फेला
उद्योगमैत्री बैंकिङ प्रणाली बनाउन राष्ट्र बैंकलाई भीम घिमिरेका १० बुँदे सुझाव
उदयपुरका इन्स्पेक्टर अस्वीन तोलांगे सर्वोत्कृष्ट प्रहरी घोषित
नेपालगञ्जमा रगत अभाव, दैनिक ८० पिन्टसम्म माग
सिद्धार्थ स्कुलका शिक्षक–कर्मचारीद्वारा सामाजिक सञ्जालमा आएको गुनासोप्रति आपत्ति
सिद्धार्थ स्कुलका शिक्षक–कर्मचारीद्वारा सामाजिक सञ्जालमा आएको गुनासोप्रति आपत्ति
© 2024 Muluki Khabar. All Rights Reserved. Design & Develop By: Indesign Media Pvt. Ltd.