निर्माण व्यवसायी महासंघ कोशीको अधिवेशन : निर्माण क्षेत्रका समस्या समाधान गर्न नीतिगत सुधारमा जोड

Share this
666shares
मुलुकी खबर
मुलुकी खबर
clock२०८३ मंसिर ४, शुक्रबार १६:४९

विराटनगर । निर्माण क्षेत्रका विद्यमान समस्या समाधान, कानुनी तथा नीतिगत सुधार र निर्माण व्यवसायीको हकहित संरक्षणको मागसहित निर्माण व्यवसायी महासंघ कोशी प्रदेशको १६औँ वार्षिक साधारण सभा तथा ९औँ अधिवेशन शुक्रबार विराटनगरमा सुरु भएको छ ।

अधिवेशनको उद्घाटन सत्रमा सहभागी निर्माण व्यवसायी तथा महासंघका अगुवाहरूले निर्माण क्षेत्रमा देखिएका भुक्तानी समस्या, म्याद थप, नदीजन्य निर्माण सामग्रीको अभाव, मूल्यवृद्धि र जटिल कानुनी व्यवस्थाले व्यवसायीलाई परेको समस्याका बारेमा चर्चा गरेका छन् । उनीहरुले निर्माण क्षेत्रलाई व्यवस्थित, मर्यादित र व्यावसायिक बनाउन नीतिगत सुधार आवश्यक रहेकोमा जोड दिएका छन् ।

कार्यक्रममा स्वागत मन्तव्य राख्दै महासंघ कोशी प्रदेशका वरिष्ठ उपाध्यक्ष केशरकुमार बुढाथोकीले संस्थाको स्थापना र विकासक्रमसँगै निर्माण व्यवसायीले अहिले भोगिरहेका समस्याका बारेमा जानकारी गराए । उनका अनुसार २०५२ साल पुस २१ गते तयारी समिति गठन गरी २०५३ साल असोज १८ गते प्रथम सम्मेलनमार्फत पूर्वका १६ जिल्ला समेटेर पूर्वाञ्चल क्षेत्रीय निर्माण व्यवसायी संघ स्थापना भएको थियो । देश संघीय लोकतान्त्रिक गणतन्त्रमा रूपान्तरण भएपछि २०७३–०७४ सालतिर संस्था पूर्वअध्यक्ष मोहनप्रसाद अधिकारीको नेतृत्वमा निर्माण व्यवसायी महासंघ कोशी प्रदेशका रूपमा रूपान्तरण भएको उनले बताए ।

बुढाथोकीले कोशी प्रदेशका १४ वटै जिल्लामा प्रदेश सरकारबाट सञ्चालित ३६५ वटा सालबसाली योजनामा म्याद थप र भुक्तानीको ठूलो समस्या रहेको बताए । समस्या समाधानका लागि महासंघले प्रदेश सरकारसँग निरन्तर छलफल र पहल गरिरहेको उनको भनाइ थियो ।

नदीजन्य सामग्रीको उत्खननमा रोक, साउन–भदौमा सरकारी काम प्रभावित हुने अवस्था, भुक्तानीमा ढिलाइ र निर्माण सामग्रीको अत्यधिक मूल्यवृद्धिले व्यवसायी आर्थिक मारमा परेको उनले बताए । यस्ता चुनौतीका बाबजुद निर्माण व्यवसायीले आफ्नो पेसामा टिक्दै हकहितका लागि संघर्ष गरिरहेको उनको भनाइ थियो ।

साना र ठूला निर्माण व्यवसायीबीच विगतमा रहेको दूरी घटाउँदै सबैलाई समेटेर अघि बढ्ने वातावरण निर्माण गर्न महासंघले प्रयास गरिरहेको बुढाथोकीले बताए । हालै लागू भएको एभरेज बिडिङ प्रणाली तथा एउटा कम्पनीले पाँचवटाभन्दा बढी निर्माण कार्य गर्न नपाउने व्यवस्थालाई इमानदारीपूर्वक कार्यान्वयन गर्नुपर्नेमा पनि उनले जोड दिए । निर्माण क्षेत्रलाई मर्यादित र व्यवस्थित बनाउन अझै धेरै काम गर्न बाँकी रहेको उल्लेख गर्दै उनले यी समस्या समग्र निर्माण उद्योगकै साझा चुनौती भएको बताए ।

कार्यक्रमका प्रमुख अतिथि नेपाल निर्माण व्यवसायी महासंघका अध्यक्ष निकोलस पाण्डेले निर्माण व्यवसायलाई पुस्तान्तरण हुने पेसाका रूपमा मात्र नभई उद्योगका रूपमा विकास गरी भविष्यको सम्पत्तिका रूपमा स्थापित गर्नुपर्ने बताए । समय सबैका लागि बराबर हुने भएकाले भाषणभन्दा कामलाई प्राथमिकता दिनुपर्ने उल्लेख गर्दै उनले नेतृत्वले प्रदेश तथा जिल्लाका व्यवसायीका समस्या र सुझाव सुन्ने अभ्यास गर्नुपर्ने बताए ।

नयाँ खरिद ऐनको दोस्रो संशोधनपछि उपलब्ध हुने २० प्रतिशत पेस्की रकमको सही सदुपयोग गर्नुपर्नेमा जोड दिँदै पाण्डेले उक्त रकम व्यक्तिगत वा अन्य प्रयोजनमा खर्च गर्न नहुने बताए । पेस्की रकमको उचित प्रयोग गर्न सके बैंक ऋणमाथिको निर्भरता घटाउनुका साथै निर्माण कार्यलाई प्रभावकारी रूपमा अघि बढाउन सकिने उनको भनाइ थियो ।

उनले आगामी डिसेम्बर ९ र १० गते काठमाडौंमा आयोजना हुने पूर्वाधार लगानी सम्मेलनमार्फत ठूला आयोजनामा निजी तथा विदेशी लगानी भित्राउने तयारी भइरहेको जानकारी दिए । त्यसका लागि करिब ६० वटा कानुन संशोधनको मस्यौदा तयार भइरहेको उल्लेख गर्दै उनले प्रस्तावित संशोधनले वन, जग्गा प्राप्ति तथा नदीजन्य र खानीजन्य निर्माण सामग्रीसँग सम्बन्धित समस्या समाधानमा सहयोग पुग्ने अपेक्षा व्यक्त गरे ।

महासंघ कोशी प्रदेशका अध्यक्ष तथा कार्यक्रमका सभाध्यक्ष जनसेवक भण्डारीले निर्माण व्यवसायीले सहज रूपमा काम गर्न सक्ने वातावरण निर्माण गर्न निर्माणसम्बन्धी कानुनलाई समयसापेक्ष, स्पष्ट र व्यावहारिक बनाउनुपर्ने बताए । जटिल तथा एकआपसमा बाझिने कानुनी व्यवस्थाले निर्माण कार्यमा अवरोध सिर्जना गरिरहेको भन्दै उनले काम गर्न सहज हुने कानुनी व्यवस्था आवश्यक रहेको बताए ।

निर्माण कार्यसँग सम्बन्धित रुजुका कारण व्यवसायीले अनावश्यक तनाव र समस्या भोग्नु परेको उल्लेख गर्दै भण्डारीले न्यायसंगत तथा व्यावहारिक रूपमा रुजु फिर्ताको व्यवस्था हुनुपर्ने माग गरे । महासंघको सदस्यता विस्तारका लागि सदस्यता शुल्कलाई सुलभ बनाउनुपर्ने र देशभरका निर्माण व्यवसायीलाई एउटै छातामुनि समेट्नुपर्ने उनको भनाइ थियो । कोशी प्रदेशका निर्माण व्यवसायीको हक, हित र अधिकार संरक्षणका लागि आफू सधैँ व्यवसायीको साथमा रहने प्रतिबद्धता पनि भण्डारीले व्यक्त गरे ।

कार्यक्रममा नेपाल निर्माण व्यवसायी महासंघका केन्द्रीय सल्लाहकार बलिभद्र रानाले निर्माण क्षेत्रमा भएका राम्रा तथा गुणस्तरीय कामको सबै पक्षबाट प्रशंसा हुनुपर्ने बताए । कोशी प्रदेश समितिले कानुनी र प्राविधिक क्षेत्रका एक–एक जना विज्ञलाई सल्लाहकार नियुक्त गरेकोप्रति खुसी व्यक्त गर्दै उनले व्यवसायीका व्यावसायिक, प्राविधिक तथा कानुनी समस्या समाधानका लागि प्रदेश समितिले चालेको कदम सराहनीय रहेको बताए । उनले महासंघको ९औँ अधिवेशनको पूर्ण सफलताको शुभकामना पनि व्यक्त गरे ।

अधिवेशनको उद्घाटन सत्रमा नेपाल निर्माण व्यवसायी महासंघका अध्यक्ष निकोलस पाण्डे, निवर्तमान अध्यक्ष रवि सिंह, वरिष्ठ उपाध्यक्ष मुकेश पन्त, नेपाली कांग्रेस कोशी प्रदेशका सभापति उद्धव थापालगायतको उपस्थिति थियो । दुई दिनसम्म सञ्चालन हुने अधिवेशनको पहिलो दिन उद्घाटन तथा विभिन्न विषयमा छलफल भएको छ । दोस्रो दिन संगठनात्मक विषयमा छलफलसँगै नयाँ नेतृत्व चयनलगायतका कार्यक्रम हुने महासंघले जनाएको छ ।

तपाइको प्रतिक्रिया
विराटनगरका २ हजार २५७ परिवारले पाउँदैछन् ‘गरिब परिचयपत्र’
हाटखोला श्मशान घाटको व्यवस्थापन सुधार्न महानगरको चासो
भारत भ्रमणको तयारीमा प्रधानमन्त्री शाह, रविसँग तीन घण्टा छलफल
दोस्रो झापा महिला गोल्डकपको तयारी पूरा, शनिबारदेखि खेल सुरु
मेची–महाकाली पदयात्रामा रहेका सांसद अमरेश सिंहलाई विराटनगरमा कालो झन्डा
विराटनगरको उखुबारीमा युवकको शव : घरमै आएर हत्याको धम्की, तीन दिनपछि मृत फेला
उद्योगमैत्री बैंकिङ प्रणाली बनाउन राष्ट्र बैंकलाई भीम घिमिरेका १० बुँदे सुझाव
उदयपुरका इन्स्पेक्टर अस्वीन तोलांगे सर्वोत्कृष्ट प्रहरी घोषित
नेपालगञ्जमा रगत अभाव, दैनिक ८० पिन्टसम्म माग
सिद्धार्थ स्कुलका शिक्षक–कर्मचारीद्वारा सामाजिक सञ्जालमा आएको गुनासोप्रति आपत्ति
सिद्धार्थ स्कुलका शिक्षक–कर्मचारीद्वारा सामाजिक सञ्जालमा आएको गुनासोप्रति आपत्ति
© 2024 Muluki Khabar. All Rights Reserved. Design & Develop By: Indesign Media Pvt. Ltd.