विराटनगरको उखुबारीमा युवकको शव : घरमै आएर हत्याको धम्की, तीन दिनपछि मृत फेला

Share this
699shares
मुलुकी खबर
मुलुकी खबर
clock२०८३ मंसिर ४, शुक्रबार १८:१९

विराटनगर । मोबाइल चोरी गरेको आरोपमा केही युवाले हत्या गर्ने धम्की दिएको तीन दिनपछि विराटनगरमा एक युवकको शव उखुबारीमा फेला परेको छ ।

विराटनगर महानगरपालिका–४ इक्राहीका ३२ वर्षीय राजन दासको हत्या गरेर फालेको अवस्थामा शुक्रबार दिउँसो इक्राहीकै उखुबारीमा शव भेटिएको हो । तीन दिनदेखि परिवार र आफन्तको सम्पर्कबाट बाहिर रहेका दासको खोजी भइरहेका बेला उनको शव प्रेम गौतमको खेतमा बलराम यादवले लगाएको उखुबारीभित्र घोप्टो परेको अवस्थामा फेला परेको थियो । सुरुमा पहिचान नखुलेको शव पछि स्थानीय ३२ वर्षीय दासको रहेको पुष्टि भएको मोरङ प्रहरीले जनाएको छ ।

शवको प्रकृति र शरीरमा देखिएका चोटपटकले दासको हत्या भएको प्रहरीको प्रारम्भिक निष्कर्ष छ । उनको दाहिने कान, आँखा, अनुहारलगायत शरीरका विभिन्न भागमा चोट लागेको छ । हातको एउटा औँला काटिएको र घाउबाट सामान्य रक्तस्राव भइरहेको अवस्थामा शव भेटिएको प्रहरीले जनाएको छ । शरीरमा लगाएका कपडा भने यथावत् थिए ।

घटनाको जानकारी पाएलगत्तै मोरङ प्रहरी प्रमुख एसपी कवित कटवाल आफैं घटनास्थल पुगेका थिए । फरेन्सिक चिकित्सकसहितको प्रहरी टोलीले घटनास्थलको निरीक्षण र प्रारम्भिक अनुसन्धानबाट हत्या भएको निष्कर्ष निकालेको हो । हत्यामा संलग्नको पहिचान तथा खोजीका लागि तालिमप्राप्त कुकुरसहित प्रहरी परिचालन गरिएको छ ।

प्रहरीको प्रारम्भिक आकलनअनुसार दासको हत्या बिहीबार राति भएको हुनसक्छ । हत्या गरेपछि शव उखुबारीमा फालेको हुनसक्ने प्रहरीको अनुमान छ । तर, हत्या कसले र कुन कारणले गरेको हो भन्ने खुलेको छैन ।

मोरङ प्रहरीका सूचना अधिकारी डीएसपी मकेन्द्रकुमार मिश्रका अनुसार दासमाथि मोबाइल चोरीको आरोप लगाउँदै तीन दिनअघि केही युवा उनको घरसम्म पुगेको जानकारी परिवारका सदस्यले दिएका छन् । उनीहरूले दासलाई भेटे हत्या गर्नेसम्मको धम्की दिएको जानकारी प्रहरीले प्राप्त गरेको छ । ती युवा घर पुग्दा दास भने त्यहाँ थिएनन् ।

मोबाइल चोरीको आरोप लगाउने युवाहरूमाथि पनि प्रहरीले अनुसन्धान केन्द्रित गरेको छ । उनीहरूकै संलग्नतामा हत्या भएको हुनसक्ने आशंका गरिए पनि अहिलेसम्म कसैको संलग्नता पुष्टि भइसकेको छैन । प्रहरीले सम्भावित सबै कोणबाट अनुसन्धान अघि बढाएको छ ।

‘मोबाइल चोरीको आरोप लगाएर केही युवा दासको घरसम्म पुगेका रहेछन् । भेटेमा हत्या गर्ने धम्की दिएको भन्ने जानकारी आएको छ । मोबाइल चोरीकै विषयलाई लिएर हत्या भएको हो वा अन्य कारण छ भन्ने अनुसन्धानपछि मात्रै खुल्छ,’ प्रहरी स्रोतले भन्यो ।

परिवारले दिएको जानकारीअनुसार दास काठमाडौंमा रङ लगाउने काम गर्दै आएका थिए । छठ पर्वको समयमा उनी काठमाडौंबाट घर आएका थिए । परिवारका सदस्य र आफन्तले उनी तीन दिनदेखि सम्पर्कमा नरहेको बताएका छन् । सम्पर्कविहीन भएपछि उनीहरू दास काठमाडौं फर्किएको हुनसक्ने अनुमानमा थिए । तर, अनुमानविपरीत शुक्रबार उनको शव नै भेटियो ।

दासकी श्रीमती पार्वती दास दुई वर्षदेखि वैदेशिक रोजगारीका सिलसिलामा कुवेतमा छिन् । प्रहरीका अनुसार उनीहरूबीचको सम्बन्ध राम्रो नरहेको प्रारम्भिक जानकारी प्राप्त भएको छ । दासका १३ वर्षकी छोरी र १२ वर्षका छोरा रहेको परिवारले जनाएको छ । उनीहरूको हेरचाह र लालनपालन दासकी सालीले गर्दै आएकी थिइन् ।

मृतकको गोजीबाट गाँजा सेवन गर्न प्रयोग गरिने चिलिमसमेत फेला परेको प्रहरीले जनाएको छ । चिलिम भेटिएकाले दासले गाँजा सेवन गर्ने गरेको हुनसक्ने प्रहरीको प्रारम्भिक अनुमान छ । यद्यपि, यसको हत्यासँग कुनै सम्बन्ध छ वा छैन भन्ने खुलेको छैन ।

प्रहरीले घटनास्थलको मुचुल्का तयार पारेर आवश्यक प्रमाण संकलन गरेको छ । कानुनी प्रक्रिया पूरा गरेपछि शवलाई पोस्टमार्टमका लागि कोशी अस्पताल पठाइएको जानकारी डीएसपी मिश्रले दिए ।

जिल्ला प्रहरी कार्यालय मोरङका इन्स्पेक्टर लेखनाथ दाहाल नेतृत्वको टोलीले घटनाको विस्तृत अनुसन्धान गरिरहेको छ । पोस्टमार्टम रिपोर्ट, घटनास्थलबाट संकलित प्रमाण र अनुसन्धानबाट प्राप्त तथ्यका आधारमा हत्याको कारण पत्ता लाग्ने प्रहरीको भनाइ छ ।

‘घटनास्थलको मुचुल्का उठाएर अनुसन्धान सुरु गरेका छौं । आवश्यक प्रमाण संकलन भइरहेको छ । हत्यामा संलग्नको पहिचान गरी तत्काल पक्राउ गर्न विशेष टोली परिचालन गरिएको छ । घटनाको अनुसन्धानलाई तीव्र बनाएका छौं,’ डीएसपी मिश्रले भने ।

तपाइको प्रतिक्रिया
विराटनगरका २ हजार २५७ परिवारले पाउँदैछन् ‘गरिब परिचयपत्र’
हाटखोला श्मशान घाटको व्यवस्थापन सुधार्न महानगरको चासो
भारत भ्रमणको तयारीमा प्रधानमन्त्री शाह, रविसँग तीन घण्टा छलफल
दोस्रो झापा महिला गोल्डकपको तयारी पूरा, शनिबारदेखि खेल सुरु
मेची–महाकाली पदयात्रामा रहेका सांसद अमरेश सिंहलाई विराटनगरमा कालो झन्डा
विराटनगरको उखुबारीमा युवकको शव : घरमै आएर हत्याको धम्की, तीन दिनपछि मृत फेला
उद्योगमैत्री बैंकिङ प्रणाली बनाउन राष्ट्र बैंकलाई भीम घिमिरेका १० बुँदे सुझाव
उदयपुरका इन्स्पेक्टर अस्वीन तोलांगे सर्वोत्कृष्ट प्रहरी घोषित
नेपालगञ्जमा रगत अभाव, दैनिक ८० पिन्टसम्म माग
सिद्धार्थ स्कुलका शिक्षक–कर्मचारीद्वारा सामाजिक सञ्जालमा आएको गुनासोप्रति आपत्ति
सिद्धार्थ स्कुलका शिक्षक–कर्मचारीद्वारा सामाजिक सञ्जालमा आएको गुनासोप्रति आपत्ति
© 2024 Muluki Khabar. All Rights Reserved. Design & Develop By: Indesign Media Pvt. Ltd.