विषाक्त मदिरा सेवनबाट मणिपुरमा १६ जनाको मृत्यु

Share this
705shares
मुलुकी खबर
मुलुकी खबर
clock२०८३ मंसिर ६, आइतबार १२:२६

एजेन्सी । भारतको उत्तरपूर्वी राज्य मणिपुरमा विषाक्त मदिरा सेवनबाट मृत्यु हुनेको सङ्ख्या १६ पुगेको छ । घटनामा बिरामी परेका करिब ६०० जना विभिन्न अस्पतालमा उपचाररत रहेको अधिकारीहरूले बताएका छन् ।

मणिपुरको चन्देल जिल्लास्थित चकपिकारोङ क्षेत्रमा घटना भएको हो । यो क्षेत्र राज्यको राजधानी इम्फालबाट करिब ७५ किलोमिटर दक्षिणमा पर्छ । स्थानीय सरकारी अधिकारीका अनुसार विषाक्त मदिरा सेवनबाट मृत्यु हुनेको सङ्ख्या १६ पुगेको छ । भारतको सरकारी प्रसारण संस्था अल इन्डिया रेडियोका अनुसार करिब ६०० जनालाई सरकारी तथा निजी अस्पतालमा भर्ना गरिएको छ ।

मणिपुरका वरिष्ठ स्थानीय सरकारी अधिकारी हुन्ग्यो वोरसाङले जिल्ला प्रशासन, प्रहरी, अन्तःशुल्क र स्वास्थ्य विभागका टोलीले प्रभावित क्षेत्र तथा अस्पतालको भ्रमण गरी अवस्थाबारे जानकारी लिएको र आवश्यक सहयोग उपलब्ध गराइरहेको बताएका छन् ।

घटनामा संलग्न रहेको आशङ्कामा प्रहरीले छ जनालाई पक्राउ गरेको छ । घटनाको छानबिन गर्न मणिपुर सरकारले उच्चस्तरीय अनुसन्धान समिति गठन गरेको छ । समितिलाई घटनाको कारण पत्ता लगाउन, सम्भावित कमजोरी पहिचान गर्न र आवश्यक कारबाहीका लागि सुझावसहित एक महिनाभित्र प्रतिवेदन बुझाउन निर्देशन दिइएको छ ।

अधिकारीहरूका अनुसार शङ्कास्पद मदिरामा विषाक्त पदार्थ भए–नभएको पत्ता लगाउन नमुना सङ्कलन गरी फरेन्सिक परीक्षणका लागि पठाइएको छ । यसैबीच, विषाक्त मदिरा सेवनबाट मृत्यु र बिरामी हुने घटना बढेपछि मणिपुरको स्वास्थ्य विभागले सार्वजनिक स्वास्थ्यसम्बन्धी सचेतना सूचना जारी गरेको छ ।

विभागले सबै सरकारी तथा निजी स्वास्थ्य संस्थालाई सतर्क रहन, बिरामीलाई तत्काल उपचार उपलब्ध गराउन, आवश्यक परे अन्य अस्पतालमा पठाउन र शङ्कास्पद घटनाको विवरण अनिवार्य रूपमा उपलब्ध गराउन निर्देशन दिएको छ ।

तपाइको प्रतिक्रिया
© 2024 Muluki Khabar. All Rights Reserved. Design & Develop By: Indesign Media Pvt. Ltd.