
काठमाडौँ । राष्ट्रिय स्वतन्त्र पार्टी (रास्वपा) को केन्द्रीय समिति बैठक आज बस्दैछ । पार्टी कार्यालय वनस्थलीमा सुरु हुने केन्द्रीय समिति बैठकका लागि १० वटा एजेण्डा छन् ।
एजेण्डामा केन्द्रीय अनुशासन आयोगको सिफारिस सहितको प्रतिवेदन बारे छलफल हुनेछ । रास्वपा स्रोतका अनुसार प्रतिवेदन पूर्वमहामन्त्री डा. मुकुल ढकालको कार्यशैलीका विषयमा छ । आजको बैठकले प्रतिवेदनका आधारमा उनलाई साधारण सदस्यसमेत नरहने गरी निष्काशनको तयारी रहेको एक केन्द्रीय सदस्यले जानकारी दिए ।
पार्टी हित विपरीतको गतिविधि गरेको भन्दै उनलाई महामन्त्री र प्रवक्ताको जिम्मेवारीबाट हटाएकाे थियाे । त्यसपछि निरन्तर उनले सभापति रवि लामिछानेका विरुद्ध अभिव्यक्ति दिँदै आएका छन् । उनीसँग पार्टीले दुई पटक स्पष्टीकरणसमेत सोधिसकेको छ ।
यस्ता छन् बैठकका एजेण्डा –
१, समसामयिक राजनीति र पार्टी गतिविधि ।
२, राष्ट्रिय भेला ।
३, कर्णाली विशेष अभियान र सबै प्रदेशमा सभापति समेतको कार्यक्रम ।
४, संगठन निर्माण सम्बन्धी कार्यविधि संशोधन ।
५, केन्द्र तथा सातै प्रदेशको बन्द कार्यशालाको प्रतिवेदन र उपलब्धि बारे छलफल ।
६, स्थानीय तह उपनिर्वाचन बारे ।
७, संविधान दिवसको कार्यक्रम बारे ।
८, भ्रष्टाचारको मुद्दाको हदम्याद, वर्तमान सरकारबाट भएको शिक्षामा राजनीतिकरणको निरन्तरताको प्रयास र भ्रष्ट एवं स्वार्थ बाझिनेलाई मन्त्री नियुक्ति गरिएको बारे छलफल।
९, केन्द्रीय अनुशासन आयोगको सिफारिस सहितको प्रतिवेदन बारे ।
१०, विविध

























