नेपाली कांग्रेस कोशी प्रदेश संसदीय दलका नेता उद्धव थापा ।विराटनगर । नेपाली कांग्रेसले कोशी प्रदेशमा ५ वटा मन्त्रालय लिने गरी भागबन्डा गरेको छ । यद्यपि, भागबन्डाको विषयलाई कांग्रेसले औपचारिक हिसाबबाट सार्वजनिक गरेको छैन ।
कांग्रेसलाई ५ वटा दिँदा कोशीमा विभाजन गरेर मन्त्रालयको संख्या बढाउनुपर्ने हुन्छ । तर, मुख्यमन्त्री हिक्मतकुमार कार्की मन्त्रालयको संख्या नबढाउने पक्षमा छन् । कांग्रेसले यसअघि सत्तारुढ नेकपा (एमाले)सँग ४ वटा मन्त्रालय लिएर सरकारमा सहभागी हुने सहमति गरेको थियो ।
एमाले प्रदेश संसदीय दलका नेतासमेत रहेका कार्कीको नेतृत्वमा कोशी सरकार छ । कांग्रेसले एमाले नेतृत्वकै सरकारमा सहभागी हुने निर्णय गरेको थियो ।
तर, आन्तरिक किचलोमा फसेको कांग्रेस अहिलेसम्म सरकारमा सहभागी भएको छैन । आन्तरिक भाडबन्डा मिलाउने क्रममा भने ५ वटा मन्त्रालय बाँडफाँट गरिएको नेताहरु बताउँछन् ।
नेताहरुका अनुसार प्रदेश सरकारको सहभागिताको विषयमा पार्टीभित्रको आन्तरिक भागबन्डा मिलेको छ । यसअघि ४ वटा मन्त्रालय पाउने भनिएको कांग्रेसले आन्तरिक भागबन्डा गर्दा २, २ र १ बनाएको छ ।
भागबन्डा गरेर पार्टी सभापति शेरबहादुर देउवा र डाक्टर शेखर कोइराला समूहका लागि २–२ र कृष्णप्रसाद सिटौला समूहका लागि एउटा मन्त्रालय छुट्याइएको छ । प्रधानमन्त्री एवं एमाले अध्यक्ष केपी शर्मा ओलीसँग कांग्रेस सभापति देउवाले विभाजन गरेर प्रदेशमा मन्त्रालयको संख्या बढाउने सहमति गरेको बताइन्छ । उक्त सहमतिपछि कांग्रेसले ५ वटा मन्त्रालयमा भागबन्डा गरेको हो ।
कांग्रेस कोशी प्रदेशका प्रमुख सचेतक गोपाल तामाङले पनि आन्तरिक छलफलपछि सरकारमा सहभागिताको विषय टुंगो लागेको बताए । ‘औपचारिक जानकारी त आएको छैन । तर, अनौपचारिक जानकारी आएको छ । औपचारिक जानकारी आएपछि सरकारमा कांग्रेस सहभागी हुन्छ,’ उनले भने ।
कांग्रेसले मन्त्रालयको भागबन्डा गरेर आफूले ५ वटा पाउनुपर्ने स्पष्ट संकेत गरिरहँदा मुख्यमन्त्री कार्की भने मन्त्रालय नफुटाउने पक्षमा देखिएका छन् । कांग्रेसकै लागि मन्त्रालय विभाजन गर्न नहुने उनको स्पष्ट अडान छ । कोशीमा ९ वटा मन्त्रालय छन् ।
कांग्रेसले विभाजन गर्ने योजनासहित ५ वटा मन्त्रालय भाग गरेको विषयमा कार्कीले भने, ‘९ वटै लिए पनि भयो नि ।’ उनले अहिले मन्त्रालय विभाजन गर्न नहुने बताए ।
‘सबै हिसाबले मन्त्रालय विभाजन गर्न उपयुक्त देखिँदैन । अहिले मन्त्रालय फुटदैन् । त्यो अहिले सम्भव छैन,’ कार्कीले भने, ‘माथि (केन्द्र)बाट प्रहरी समायोजन र अरु अधिकार दियो भने हुनसक्छ । त्यसका लागि (समायोजन) पनि २–४ महिना समय लाग्ला । तत्काल मन्त्रालय विभाजनको कुनै सम्भावना छैन ।’ उनले एमालेसँग भएको पछिल्लो सहमति अनुसार नै कांग्रेस सरकारमा सहभागी हुने बताए ।
कांग्रेस र एमालेबीच गत साउन १२ गते कोशीका ४–४ मन्त्रालय भागबन्डा गर्ने सहमति भएको थियो । तर, नेपाली कांग्रेसभित्र डाक्टर शेखर कोइराला पक्षले दुईवटा मन्त्रालय दाबी गरेपछि कांग्रेस सरकारमा सहभागी भएको छैन ।
मन्त्रालय विभाजन गरेर भए पनि आफूलाई ५ वटा मन्त्रालय दिनुपर्ने पक्षमा कांग्रेस छ । चौतर्फी विरोध भइरहँदा पनि कांग्रेस मन्त्रालय फुटाउन जोडतोडले लागेको देखिन्छ ।
नेपाली कांग्रेसका केन्द्रीय सदस्य तथा कोशी प्रदेशका सांसद भीम पराजुलीले शीर्ष नेताबीच कोशी प्रदेशमा ११ वटा मन्त्रालय बनाउने सहमति भएको जानकारी दिए । केन्द्रीय समितिको बैठकपछि प्रदेशको विषयमा आधिकारिक निर्णय आउने उनको भनाइ छ ।
एमाले कोशी प्रदेशका प्रमुख सचेतक रेवतीरमण भण्डारी प्रदेशमा मन्त्रालयको संख्या बढाउन आवश्यक नरहेको बताउँछन् । ‘कांग्रेस– एमाले ४–४ वटा मन्त्रालय लिने सहमति भएको हो,’ उनले भने, ‘मन्त्रालय थप गर्न एमाले तयार हुँदैन ।’

























