
पोखरा । गण्डकी प्रदेशमा मन्त्रालय फुटाएर सरकार विस्तार गरिएको छ । कांग्रेस एमालेको सहमतिबीच ७ वटा रहेको मन्त्रालयलाई ९ वटा बनाएपछि एमाले सरकारमा सहभागि भएको हो ।
आज नेकपा एमालेबाट नियुक्त भएका ४ जना मन्त्रीले शपथ ग्रहण गरे । एमाले केन्द्रीय लेखा आयोग सदस्य पद्मा जिसीको नेतृत्वमा गएका ४ जना मन्त्रीलाई प्रदेश प्रमुख डिल्लीराम भट्टले पद तथा गोपनीयताको शपथ गराएका हुन् ।
नवलपुरकी पद्माले कृषि, भूमि व्यवस्था तथा सहकारी, बागलुङका कृष्ण पाठकले स्वास्थ्य, पर्वतका मित्रलाल बस्यालले उद्योग तथा पर्यटन र कास्कीका प्रकाशबहादुर केसीले भौतिक पूर्वाधार तथा यातायात व्यवस्था मन्त्रालय पाएका छन् ।
गण्डकीमा ७ बाट बढाएर ९ मन्त्रालय बनाएपछि एमालेले ४ मन्त्रालय पाएको हो । सामाजिकबाट फुटाएर स्वास्थ्य बनाइएको छ । उद्योग तथा पर्यटन र वन तथा वातावरणलाई दुई वटा बनाइएको छ ।
यसअघि भौतिक पूर्वाधार तथा यातायात व्यवस्थामन्त्री दीपक मनाङेको जिम्मेवारी हेरफेर गर्दै वन तथा वातावरण मन्त्रालयको जिम्मेवारी दिइएको छ । एमालेका ४ मन्त्री थपिएपछि गण्डकीको मन्त्रिपरिषदले पूर्णता पाएको छ ।

























