
काठमाडौं । सर्वोच्च अदालतका न्यायाधीश हरिप्रसाद फुयाल करिब दुई साताको बिदापछि मंगलबार नियमित काममा फर्किने भएका छन् । इनम सापकोटासँगको सम्पर्क र भेटघाटको विवरण सार्वजनिक भएपछि विवादमा तानिएका फुयाल न्यायालयभित्र र बाहिर विभिन्न प्रश्न उठिरहेका बेला इजलासमा फर्किन लागेका हुन् ।
न्यायाधीश फुयाल र सापकोटाबीच भएको भनिएको ह्वाट्सएप संवाद सार्वजनिक भएपछि न्यायिक आचरण, स्वतन्त्रता र अदालतमा बाह्य प्रभावको सम्भावनाबारे बहस सुरु भएको थियो । फुयालले सापकोटासँग भेटघाट भएको स्वीकार गर्दै उनले प्रधानमन्त्री बालेन्द्र शाहको विशेष प्रतिनिधिका रूपमा आफूलाई परिचय दिएको बताएका थिए ।
फुयालका अनुसार सापकोटाले सुरुमा न्यायाधीशहरूविरुद्ध महाभियोग लाग्न सक्ने चर्चा चलिरहेको भन्दै आफू प्रधानमन्त्रीको सन्देश लिएर आएको बताएका थिए । नआत्तिन आग्रह गरेका सापकोटाले पछि सर्वोच्च अदालतमा विचाराधीन मुद्दाहरूबारे चासो देखाउन थालेको फुयालको दाबी छ । विभिन्न मुद्दामा आफूले चाहेको आदेश गराउन खोज्ने र प्रधानमन्त्रीको नाम जोडेर न्यायाधीशमाथि प्रभाव पार्न खोजेको उनको भनाइ छ ।
तर, यी दाबीको स्वतन्त्र पुष्टि अनुसन्धानबाट हुन बाँकी छ । सार्वजनिक विवरणका आधारमा फुयाल कुनै कसुरमा दोषी ठहर भइसकेका छैनन् । विवादको चर्चित प्रसंग व्यवसायी रोहित गुप्तासँग सम्बन्धित मुद्दा हो । सार्वजनिक भएको संवादमा सापकोटाले गुप्तालाई थुनामै राख्नुपर्ने आशय व्यक्त गरेको विवरण बाहिरिएको थियो । फुयालका अनुसार सापकोटाले प्रधानमन्त्रीको चाहना भन्दै गुप्तालाई थुनामा राख्न आग्रह गरेका थिए ।
तर, आफूले मुद्दाका तथ्य र कम्पनीमा गुप्ताको भूमिकाबारे अध्ययन गर्दा धरौटीमा छाड्न योग्य देखिएकाले त्यहीअनुसार अडान राखेको फुयालले पत्रकारहरूसँग बताएका थिए । सापकोटाको चाहनाअनुसार आदेश दिएको भए त्यसलाई बाह्य प्रभावको परिणाम मान्न सकिने भए पनि आफूले मुद्दाको तथ्यका आधारमा निर्णय गरेको उनको जिकिर थियो ।
सापकोटाको गतिविधिबारे आफूहरू आफैँले सम्बन्धित निकायलाई जानकारी गराउन पुगेको पनि फुयालले बताएका छन्। उनका अनुसार सापकोटाले विभिन्न न्यायाधीशसँग सम्पर्क बढाउँदै विचाराधीन मुद्दाबारे चासो राख्न थालेपछि पाँचदेखि सात जना न्यायाधीशले सामूहिक छलफल गरेका थिए । त्यसपछि प्रहरी महानिरीक्षक डानबहादुर कार्कीलाई बोलाएर सापकोटाको पृष्ठभूमि र गतिविधिबारे जानकारी लिन खोजिएको उनको भनाइ छ ।
फुयालका अनुसार प्रहरी प्रमुखबाट अपेक्षित सहयोग नपाएपछि न्यायाधीशहरूले प्रधानसेनापति अशोकराज सिग्देलसँग पनि सापकोटाबारे जानकारी लिएका थिए । सेनाले सापकोटालाई व्यक्तिगत वा संस्थागत रूपमा प्रयोग नगरेको र उनीसँग आफ्नो सम्बन्ध नरहेको जवाफ दिएको फुयालले बताएका छन् ।
विवाद चर्किएपछि सर्वोच्च अदालतको पूर्ण बैठक बसेको थियो । कात्तिक १७ गतेको बैठकले सञ्चारमाध्यममा सार्वजनिक भएका विषयमा संविधान र कानुनबमोजिम निष्पक्ष तथा स्वतन्त्र छानबिन गर्न सम्बन्धित निकायलाई आग्रह गर्ने निर्णय गरेको थियो । छानबिनबाट प्राप्त निष्कर्ष सार्वजनिक गर्न पनि अदालतले आग्रह गरेको थियो ।
विवाद र छानबिनको विषय टुंगोमा नपुग्दै फुयाल नियमित काममा फर्किन लागेका हुन् । उनको पुनरागमनसँगै सार्वजनिक भएका संवाद, बाह्य प्रभावको आरोप र न्यायिक स्वतन्त्रतासम्बन्धी प्रश्नमाथिको चासो पनि कायम रहने देखिन्छ ।

























