
विराटनगर । कोशी प्रदेशका मुख्यमन्त्री हिक्मतकुमार कार्कीले प्रदेश सरकार सुरुङ यात्रामा हिँड्दाजस्तो अवस्थामा रहेको बताएका छन् ।
संविधान दिवसका अवसरमा प्रदेश सरकारले विराटनगरमा बिहीबार आयोजना गरेको समारोहलाई सम्बोधन गर्दै उनले प्रदेश सरकार अप्ठेरो परिस्थितिबाट गुज्रिनु परिरहेको संकेत गरेका हुन् । ‘दायाँ कुम चलाउँदा संघीय सरकार ठोक्किने । बायाँ चलायो स्थानीय सरकार ठोक्किने । अलिकति उफ्रिएमा माथिको पर्खालमा ठोक्किने । यस्तो परिस्थितिबाट प्रदेशलाई बलियो बनाउँदै आफ्ना अधिकारहरु खोज्दै जनतामा आशाको सञ्चार जागृत गराउने कार्यमा दत्तचित्त भएर लागिरहेका छौं,’ कार्कीले भने ।
पछिल्लोपटक आफ्नो नेतृत्वमा सरकार बनेपछि प्रदेशमा सुशासन र विकासका ढोकाहरु खोलिएको दाबी उनले गरेका छन् । नर्माण सम्पन्न भएका परियोजनाहरुको उद्घाटन, गुणस्तरीय सडकहरुको सञ्चालन र सेवाप्रवाहमा चुस्तताले थोरै मात्रामा भए पनि राहत प्रदान गर्ने कोसिस भएको जिकिर उनको छ । देशका दुई ठूला राजनीतिक शक्तिहरुबीचको सहकार्य (कांग्रेस र एमालेको सहकार्य)बाट पनि नागरिकहरुमा उत्साह छाएको कार्की बताउँछन् ।
उनी भन्छन्, ‘संविधानको मर्म र भावनाविपरीत राज्य सञ्चालनमा प्रकट भएका तमाम विचलनहरुलाई रोकी संघीय लोकतान्त्रिक गणतन्त्रलाई सुदृढ गर्न विद्यमान आर्थिक शिथिलता, दण्डहिनता एवं व्याप्त निराशालाई चिर्दै प्रदेशबासी जनतामा प्रदेश संरचनाप्रति आशा र भरोसा पैदा गर्न, विशेषतः युवाहरुमा प्रकट नैराश्यता, आक्रोस र नकारात्मक सोचमा परिवर्तन गर्नु पर्ने आवश्यकता महसुस भएको छ ।’
सबै संघर्ष र आन्दोलनले ल्याएको दुरगामी महत्वका उपलब्धिको रक्षा, विकास र प्रवर्धन गर्न, राष्ट्रिय स्वाधिनता, सार्वभौमसत्ता तथा भौगोलिक अखण्डता र नेपाल राष्ट्र« तथा कोशी प्रदेशबासीको सर्वोपरी हितलाई केन्द्रमा राखी सुदृढ र सन्तुलित विकास गर्नु आजको आवश्यकता भएको कार्कीले बताए ।
वर्गीय, जातीय, क्षेत्रीय, भाषिक, लैंगिक तथा जातीय विभेदको अन्त्य गरी आर्थिक समानता, समृद्धि र सामाजिक न्याय सुनिश्चित गर्न समानुपातिक समावेशी र सहभागितामूलक र समतामूलक समाजको निर्माण गर्ने संकल्प संविधानले लिएको उनले उल्लेख गरेका छन् । मुख्यमन्त्री कार्कीले कोशी प्रदेश सरकारले संविधानको मर्मलाई बोकेर काम गरिरहेको जानकारी दिए ।
मुलुकलाई सामाजिक न्यायसहित आर्थिक समृद्धितर्फ अघि बढाउने दायित्व रहेको उल्लेख गर्दै मुख्यमन्त्री कार्कीले त्यसै अनुरुप प्रदेश सरकार अघि बढेको स्पष्ट पारे । संघीयता कार्यान्वयनको महत्वपूर्ण अंग भनेकै प्रदेश तह भएपनि माथिल्लो तह संघ र तल्लो स्थानीय तहसँगको अधिकार बाँडफाँट हुन नसक्दा समस्या भोग्दै आउनु परेको उनले उल्लेख गरेका छन् ।
मुलुकलाई सामाजिक न्यायसहितको आर्थिक समृद्धितर्फ अघि बढाउने मुख्य दायित्व प्रदेशकै भएको उनको भनाइ छ । नेपाली जनताको लामो संघर्ष र बलिदानपछि आजकै दिन ९ वर्षअघि जननिर्वाचित संविधानसभाद्वारा नेपालको संविधान जारी भएको स्मरण कार्कीले गरेका छन् ।
जनताको राजनीतिक अधिकार प्राप्तिका लागि गरिने संघर्षको चरण सम्पन्न भएपछि अब मुलुकलाई सामाजिक न्यायसहितको आर्थिक समृद्धि र राजनीतिक स्थायित्वको दिशातर्फ अघि बढाउनुपर्नेमा उनको जोड छ । ‘समृद्ध नेपाल, सुखी नेपाली’ को साझा राष्ट्रिय संकल्प हासिल गर्न सबै पक्ष लाग्नुपर्ने कार्कीले बताए ।
यस्तो छ मुख्यमन्त्री हिक्मतकुमार कार्कीले गरेको सम्बोधनको पूर्णपाठ

























