
काठमाडौं । स्थानीय तहको उपनिर्वाचन निजिकिँदै गएको छ । अबको २ महिनापछि चुनाव हुन्छ । चुनाव नजिकिँदै गएसँगै बिहिबार (आज)देखि दल दर्ता सुरु भएको छ ।
निर्वाचन आयोगले उपनिर्वाचनका लागि दल दर्ता सुरु गरेको हो । आयोगमा दर्ता कायम रहेका र आगामी उपनिर्वाचनमा भाग लिन चाहने राजनीतिक दलहरूले नेपालको संविधानको धारा २१७ र राजनीतिक दल सम्बन्धी ऐन, २०७३ को दफा ४ बमोजिम असोज १६ गतेसम्म आयोगमा दल दर्ता गराउन सक्ने छन् ।
कार्यालय समयभित्र राजनीतिक दल सम्बन्धी नियमावली, २०७४ को अनुसूची १२ बमोजिमको ढाँचामा निर्वाचन आयोगको कार्यालयमा दल दर्ताका लागि निवेदन दिन निर्वाचन आयोगले दलहरुलाई आग्रह गरेको छ । मुलुकभर स्थानीय तहका ३९ पद रिक्त छन् ।
रिक्त रहेका पदका लागि आगामी मंसिर १६ गते उपनिर्वाचन हुँदैछ । रिक्त रहेका पदमध्ये जिल्ला समन्वय समिति प्रमुख २, नगरपालिका प्रमुख १, उपप्रमुख १, गाउँपालिका अध्यक्ष २, उपाध्यक्ष ३ तथा नगर र गाउँपालिकाका वडाध्यक्ष ३० रहेका छन् ।

























