
विराटनगर । नेकपा (एमाले) र नेकपा (माओवादी केन्द्र) कोशी प्रदेशले बाढी, पहिरो र डुबानका कारण पीडित बनेकाको उद्धार, राहत एवं पुनःस्थापनामा जुट्न सबैमा आह्वान गरेका छन् ।
दुवै दलले अलगअलग विज्ञप्ति जारी गर्दै संकटको घडीमा सहयोगका लागि अपिल गरेका हुन् । एमाले कोशी प्रदेशले प्राकृतिक विपत्तिको संकटमा परेकाको राहत, उद्धार र पुनःस्थापनामा लाग्न कार्यकर्तालाई निर्देशन दिएको छ ।
पार्टीका प्रदेश अध्यक्ष घनश्याम खतिवडाले विज्ञप्ति जारी गर्दै विपद् प्रतिकार्यमा जुट्न सबै नेता तथा कार्यकर्ताहरूलाई निर्देशन दिएका हुन् । उनले विज्ञप्तिमा भनेका छन्, ‘नेकपा –एमाले) पार्टीसँग आबद्ध सबै तहका नेता, कार्यकर्तालाई विपत्तिमा परेकाहरूलाई उद्धार, राहत र पुनःस्थापनामा सहयोग गर्न र आपतकालीन सेवाहरूमा सहभागी हुन विशेष निर्देशन गर्दछौं ।’
एमालेले राहत, उद्धार र पुनःनिर्माणमा जुट्न तीनै तहका सरकार, राजनीतिक दल, संघसंस्था, निजी क्षेत्र र आमनागरिक समक्ष अपिल गरेको छ । एमालेले दसैंको मुखमा राजमार्गमा भएको क्षतिको कारण यातायात अवरुद्ध भएको हुँदा तत्काल यातायात सुचारु गराउन, घाइतेहरूको तत्काल उपचार गर्न सरकारको ध्यानाकर्षण गराएको छ ।
विज्ञप्तिमा भनिएको छ, ‘विपद्का कारण मृत्यु भएका परिवारमा राहत तथा क्षतिग्रस्त भएका घर परिवारहरूको पुनःस्थापना तत्काल गर्न संघ, प्रदेश र स्थानीय सरकारको ध्यानाकर्षण गराउँदछौं ।’
त्यस्तै, माओवादी कोशी प्रदेश अध्यक्ष हर्कबहादुर नेम्वाङ (मिक्सो)ले विज्ञप्ति जारी गर्दै बाढी, पहिरो र डुबानका कारण जनजीवन प्रभावित भएकाले तीनै तहका सरकारलाई राहत र उद्धारमा केन्द्रीत हुन आग्रह गरेका छन् । अविरल वर्षाको कारण आममानिसको जनजीवन प्रभावित बनेको उनले उल्लेख गरेका छन् ।
कोशीमा बाढी, पहिरो र डुबानमा परेर ठूलो मानवीय क्षति भएको र लाखौं रूपैयाँ बराबरको नोक्सान भएको भन्दै मिक्सोले कैयौं मानिसहरु बाढी पहिरोको जोखिममा परी उद्धारको प्रतिक्षामा रहेको जनाएका छन् । ‘बेपत्ताको खोजी गर्न, उद्धार कार्यमा लाग्न र राहत वितरणलाई चुस्त दुरुस्त बनाउन स्थानीय, प्रदेश र संघ सरकारलाई आग्रह गर्दछौं,’ उनले विप्तिमा भनेका छन् ।
‘यस विपदको घडीमा सरकारी निकायको समन्वयमा दुःख, पीडा र समस्यामा परेका आम सर्वसाधरणको खोज, उद्धार र राहत वितरणको कार्यमा जुट्न हाम्रो पार्टी कमिटी र जनवर्गीय संगठनका सम्पूर्ण कमरेडहरुलाई आग्रह गर्दछौं,’ उनले भने ।
मिक्सोले अझै केही दिन मनसुन सक्रिय रहने भएकोले आम सर्वसाधरणलाई सुरक्षित स्थानमा रहन, नदी किनारमा नबस्न र आफ्ना परिवारका सदस्यहरु वृद्धवृद्धा, बालबालिका, गर्भवतीहरुको सुरक्षामा विशेष ध्यान दिन अपिलसमेत गरेका छन् ।

























