
विराटनगर । कोशी प्रदेश सरकारले आज (बिहीबार) आफ्नो न्यूनतम साझा कार्यक्रम सार्वजनिक गर्दै छ ।
विराटनगरस्थित मुख्यमन्त्री तथा मन्त्रिपरिषद्को कार्यालयमा अपरान्ह ४ः३० बजे सरकारको न्यूनतम साझा कार्यक्रम सार्वजनिक गर्ने तयारी छ । नेकपा (एमाले) र नेपाली कांग्रेस गठबन्धनको प्रदेश सरकारले न्यूनतम साझा कार्यक्रम बनाउन असोज ६ गते कार्यदल गठन गरेको थियो ।
६ सदस्यीय कार्यदलमा २ जना मन्त्रीसमेत छन् । सत्तापक्षीय संसदीय दलको संयुक्त बैठकले न्यूनतम साझा कार्यक्रम तय गर्न कार्यदल गठन गरेको थियो ।
कार्यदलमा एमालेबाट आर्थिक मामिला तथा योजनामन्त्री रामबहादुर मगर, एमालेका प्रमुख सचेतक रेवतीरमण भण्डारी र प्रदेश सांसद तिलचन पाठक तथा कांग्रेसबाट भौतिक पूर्वाधार विकासमन्त्री भूपेन्द्र राई, कांग्रेस संसदीय दलका उपनेता हिमाल कार्की र कांग्रेसका प्रमुख सचेतक गोपाल तामाङ थिए । कार्यदलले न्यूनतम साझा कार्यक्रम तयार गर्न असोज २३ गतेसम्मको समय पाएको थियो ।
समितिले तयार गरेको न्यूनतम साझा कार्यक्रमलाई प्राथमिकतामा राखेर सरकारले आफ्नो काम गर्नेछ । कार्यदलले तयार पारेको न्यूनतम साझा कार्यक्रम, २०८१ कांग्रेस प्रदेश संसदीय दलका नेता उद्धव थापाको उपस्थितिमा मुख्यमन्त्री हिक्मतकुमार कार्कीलाई बुझाउने कार्यक्रम छ ।
कार्यदलले बुझाएपछि मुख्यमन्त्री कार्कीले न्यूनतम साझा कार्यक्रम सार्वजनिक गर्ने मुख्यमन्त्रीका स्वकीय सचिव कमल पौडेलले बताए । न्यूनतम साझा कार्यक्रमलाई प्राथमिकतामा राखेर सरकारले काम गर्ने उनको भनाइ छ ।

























