
काठमाडौं । पाँचथरमा द्वन्द्वकालीन बम विस्फोटमा परेर मृत्यु भएका नाबालक दाजु–बहिनीका परिवारलाई सरकारले आर्थिक सहयोग उपलब्ध गराउने निर्णय गरेको छ ।
बिहीबार बसेको मन्त्रिपरिषद् बैठकले सहयोग उपलब्ध गराउने निर्णय गरेको हो । पाँचथरको फालेलुङ गाउँपालिका–५, डाँडागाउँका आइतराज केरुङको घरमा भदौ १४ गते विस्फोट हुँदा दिप्सन साँवा र प्रिन्सा साँवाको मृत्यु भएको थियो । उनीहरु दाजु–बहिनी हुन् ।
मन्त्रिपरिषद् बैठकले एकाघरको परिवारलाई प्रतिपरिवार बिलबमोजिम बढीमा ५ लाखका दरले आर्थिक सहायता उपलब्ध गराउने निर्णय गरेको हो । खेल्ने क्रममा विस्फोट हुँदा ४ जना बालबालिका घाइते भएका थिए । घाइतेमध्ये ११ वर्षीय दिप्सन र अढाई वर्षीया प्रिन्साको मृत्यु भएको हो ।
मन्त्रिपरिषद् बैठकले विस्फोटमा मृत्यु भएकाका परिवारलाई आर्थिक सहयोग गर्नेसहित विभिन्न १२ वटा निर्णय गरेको छ । बबई सिँचाइ आयोजनाको लागि बर्दियाको गुलरिया नगरपालिकामा ६५ हेक्टर जग्गा प्राप्ति गर्न स्वीकृति प्रदान गर्ने, जनक शिक्षा सामग्री केन्द्र लिमिटेडलाई हुलाक टिकट, जग्गाधनी दर्ता प्रमाण पुर्जा र भिसा स्टिकर छपाइ गर्न स्वीकृति दिने, स्लोभानियासमेतका विभिन्न ११ स्थापनका अवैतनिक वाणिज्यदूत र महावाणिज्यदूतहरूको पदावधि १ अवधि (४ वर्ष) का लागि थप गर्नेलगायतका निर्णय बैठकले गरेको छ ।
यस्ता छन् मन्त्रिपरिषद् बैठकका १२ वटा निर्णय


























