
झापा । झापाको दमक नगरपालिका–९ का ३७ वर्षीय देशु भनिने यमु निरौलाको हत्यामा संलग्न भएको आरोपमा पक्राउ पर्नेको संख्या ३ पुगेको छ ।
घटनापछि फरार रहेका संखुवासभाको मादी नगरपालिका–१० घर भइ दमक–३ मा बस्दै आएका २६ वर्षीय गणेश दर्जीलाई पछिल्लोपटक शनिबार पक्राउ गरिएको झापा प्रहरीका प्रवक्ता डीएसपी कृष्णकुमार चन्दले बताए । उनका अनुसार गणेशलाई काँकडभिट्टाबाट पक्राउ गरिएको हो ।
घटनामा संलग्न भएको आरोपमा यसअघि मोरङको उर्लाबारी नगरपालिका–६ का ४२ वर्षीय प्रकाश कार्की र उर्लाबारी–७ का ४९ वर्षीय ध्रुव गौतम पक्राउ परेका थिए । घटनामा संलग्नमध्ये हालसम्म ३ जनालाई पक्राउ गरिसकिएको डीएसपी चन्दले बताए । पक्राउ परेकाविरुद्ध प्रहरीले कर्तव्य ज्यान मुद्दा चलाउन अनुसन्धान अघि बढाएको छ ।
उनका अनुसार जग्गाको विषयमा विवाद हुँदा कात्तिक ६ गते दमक–३ उज्यालो टोल विकास संस्थाको दक्षिणतर्फ बगर टोलमा कुटपिट गरेर देशुको हत्या गरिएको थियो । हत्यामा संलग्न प्रकाश र ध्रुव घटना भएकै दिन पक्राउ परेका थिए ।
घटनास्थलबाट प्रहरीले मे १ च २३९९ र प्रदेश १–०१–००१ च ८६३१ नम्बरका २ वटा कारसमेत नियन्त्रणमा लिएको थियो । घटनामा संलग्नमध्ये शेरबहादुर लिम्बू, बुद्धिमान थापा, नम चेम्जोङसहितका अन्य व्यक्तिहरु पक्राउ परेका छैनन् । फरार भएकाको खोजी तीव्र पारिएको डीएसपी चन्दले बताए ।

























