
काठमाडौं । पूर्वप्रधानमन्त्री एवं नेकपा (माओवादी केन्द्र)का अध्यक्ष पुष्पकमल दाहाल ‘प्रचण्ड’ले अहिलेको सरकार तलमाथि हुँदा माओवादीकै नेतृत्वमा नयाँ सरकार बन्ने दाबी गरेका छन् ।
पार्टीको काभ्रे– काठमाडौं सम्पर्क समितिको भेलालाई सम्बोधन गर्दै शनिबार प्रचण्डले अहिलेको सरकार ढले माओवादीकै सरकार बन्ने जिकिर गरेका हुन् । अहिलेको सरकार उल्टाउँदा माओवादीकै सरकार बन्ने उनले बताए ।
अहिले सरकारमा भएका दलहरू सबभन्दा भ्रष्टाचारी रहेको आरोप लगाउँदै प्रचण्डले पार्टीको सुशासनको अभियान त्यतिकै नछाड्ने बताए । उनले आफू नेतृत्वको सरकारले भ्रष्टाचारीहरूलाई कारबाही गर्न थाल्दा प्रतिक्रान्ति भएको समेत बताए ।
भ्रष्टाचारीलाई आफ्नो पार्टी र जनताले नछाड्ने उनको भनाइ छ । आफूले सरकार छाड्दा प्रचण्डको युग सकियो, सन्यास लिए हुन्छ भन्नेहरूले अहिले फेरि आन्दोलनको नेतृत्व गरिदिनुपर्यो भनेर भन्न थालेको प्रचण्ड बताउँछन् ।
उनले नयाँ समाजवादी आन्दोलन, नयाँ उत्पादनको आन्दोलनको सूत्रपात जरुरी रहेको पनि बताए । उत्पादनको आन्दोलनमा माओवादीले अग्रणी भूमिका खेल्नुपर्ने जरुरी रहेको उनको भनाइ छ ।

























