
काठमाडौं । राष्ट्रिय स्वतन्त्र पार्टी (रास्वपा)ले दोस्रो चरणको आन्दोलन घोषणा गरेको छ । रास्वपाका कार्यवाहक प्रवक्ता मनिष झाले आइतबार पत्रकार सम्मेलन गरेर आगामी आन्दोलनका बारेमा जानकारी दिएका छन् ।
सहकारी ठगी प्रकरणको अनुसन्धानका लागि पूर्वगृहमन्त्रीसमेत रहेका पार्टी सभापति रवि लामिछाने पक्राउ परेसँगै रास्वपा आन्दोलित छ । प्रवक्ता झाले मंसिर ८ गतेबाट दोस्रो चरणको नयाँ आन्दोलन सुरु गरिने जानकारी दिए ।
लामिछानेलाई हिरासतमा नराखी अनुसन्धान गर्न सकिने भए पनि सरकारले राजनीतिक प्रतिशोधकै कारण एक पछि अर्को मुद्दामा अनुसन्धान गर्ने भनेर हिरासत अवधि लम्ब्याइरहेको उनको दाबी छ ।
सहकारीसम्बन्धी संसदीय छानबिन समितिले सहकारीको रकम अनियमिततामा संलग्न कुनै पनि कागज प्रमाण नभेटिएको भन्ने तथ्य दिए पनि सरकारले राजनीतिक प्रतिशोध साँधेको रास्वपाको जिकिर छ ।
रास्वपाले सभापति लामिछानेलाई हिरासतबाहिर राखेर अनुसन्धान अघि बढाउन माग गरेको छ । साथै, भविष्यमा यस्तो प्रतिशोध कसैलाई नहोस् भनेर फौजदारी कानुन प्रणाली र संरचनात्मक प्रणाली सुधार गर्न सरकारलाई रास्वपाले आग्रह गरेको छ ।
उक्त पार्टीले सहकारीको बचत रकम फिर्ता गर्ने प्रक्रिया सुरु गर्न सरकारसँग माग गरेको छ । सहकारीबारे छानबिन गर्न विगतमा बनेका कार्यदल तथा समितिको सुझाव कार्यान्वयन गर्नुपर्नेमा रास्वपाको जोड छ ।

























