जिम्मेवार बनुन् निर्वाचित जनप्रतिनिधि

निर्वाचन लोकतन्त्रको मेरुदण्ड हो । अनि, जनप्रतिनिधि जनताका सच्चा अभिभावक हुन् । स्थानीय तह उपनिर्वाचनको मतपरिणाम आउने क्रम जारी रहेकै बेला नवनिर्वाचित जनप्रतिनिधिहरूका चुनौतीको पनि चर्चा हुन थालेको छ । के उनीहरूले अब अभिभावकको जिम्मेवारी पुरा गर्लान् त ? प्रश्न यत्रतत्र छ ।

अहिले निर्वाचित जनप्रतिनिधिमा उत्साहसँगै काम गर्ने दृढ संकल्प देखिएको छ । तर, उनीहरूका चुनौती पनि कम छैनन् । हालसम्म निर्वाचित जनप्रतिनिधिको कामलाई नजिकबाट केलाएका मतदाताले योबीचमा नै उनीहरूलाई छान्ने मौका पाएका हुन् । अनि, निर्वाचित जनप्रतिनिधिले पनि स्थानीयतहका तीता–मिठा क्षण देखेकै छन् । अब उनीहरूले यी देखिएका समस्या भित्र छिरेर काम गर्नुपर्नेछ । बितेका समयमा आफूले सोचेजस्तो विकास नभएको गुनासो मतदाताको छ । यो अवस्थामा नवनिर्वाचित जनप्रतिनिधिहरूले कसरी काम गर्नुपर्छ त ? पक्कै सोचेकै हुनुपर्छ ।

चुनौती र समस्या हल गर्न जनप्रतिनिधिको काँधमा ठूलो जिम्मेवारी आएको छ । शिक्षा, स्वास्थ्य, पूर्वाधार विकासलगायतका क्षेत्रमा धेरै र नयाँ काम गर्नुपर्ने दायित्व जनप्रतिनिधिहरूको छ । योसँगै स्थानीय स्तरमा देखिएको बेरोजगारी समस्या समाधान गर्नुपर्ने अर्को समस्या छ । यसलाई नै मूल नारा बनाएर अहिलेका जनप्रतिनिधिले पनि चुनाव जितेका हुन् । अब यो नारामा सीमित बन्नु हुँदैन । काम नै गरेर देखाउने समय आएको छ ।

संवैधानिक व्यवस्था अनुसार धेरै स्थानीय तहले ऐन नियम बनाउन सकेका छैनन् । यो नै अबका जनप्रतिनिधिको सबैभन्दा ठूलो चुनौती हो । स्थानीय तहलाई सबल बनाउन आवधिक योजना र योजना बैंक बनाइ अघि बढ्नुपर्ने टड्कारो आवश्यकता छ । उत्पादन र उपभोक्ताबीचको सम्बन्ध सुदृढ बनाइ बढ्दो मूल्यवृद्धि नियन्त्रण गर्नसमेत स्थानीय सरकारले नियमनलाई प्रभावकारी बनाउन आवश्यक छ ।

रोजगारी नहुँदा गाउँमा युवाको उपस्थिति न्यून हुँदै गएको छ । तर, पनि युवाको समुचित विकास, आर्थिक सामाजिक क्षेत्रलाई स्थानीय सरकारले ध्यान दिन सकेको छैन । स्वदेशमा रोजगारीको अवसर नहुँदा धेरै युवा कामको सिलसिलामा विदेशिन बाध्य छन् । नवनिर्वाचित जनप्रतिनिधि माझ स्तरयुक्त र प्राविधिक शिक्षा, रोजगारीका अवसर सिर्जना गर्न मात्र होइन युवा शसक्तीकरण, उद्यमशीलता विकास जस्ता कामलाई तीव्र बनाउन चुनौती छन् ।

नागरिकका अपेक्षा धेरै छन् । सबै अपेक्षा सम्बोधन गर्न सक्ने अवस्था नभए पनि आफूसँग भएको स्रोत साधनको सही व्यवस्थापन गरी नागरिकलाई सन्तुष्ट पारेर स्थानीय सरकारप्रतिको विश्वास बढाउनु नै नवनिर्वाचित जनप्रतिनिधिका लागि चुनौती हो ।

जनतालाई उत्साही बनाउँदै नयाँ पहिचानका साथ अघि बढ्न सक्ने क्षमता निर्वाचित जनप्रतिनिधिले राख्न सक्नुपर्छ । लाभको एजेन्डालाई प्राथमिकता दिएर परिवर्तनको एजेन्डालाई ओझेलमा नपार्ने प्रणका साथ देश र जनताको सेवामा समर्पित हुनुपर्छ ।

पारिवारिक बन्धनबाट माथि उठेर जनसमुदायको हितमा काम गर्ने, आदर्श, इमानदारी र नैतिकताको राजनीतिमा अडिएर काम गर्नुपर्छ । प्रशंसनीय र योग्य काम गरेर उदाहरणीय व्यक्तित्वका रूपमा पहिचान बनाउँदै सही निर्णय लिने र निर्णयको अन्त्यसम्म अडिन सक्ने क्षमताको विकास गर्नुपर्छ । जनप्रतिनिधिका यस अघिका आश्वासन र घोषणापत्र सबै कार्यान्वयनमा आउन्, शुभकामना ।