
चितवन । सहकारी ठगीमा पक्राउ परेका पूर्वगृहमन्त्री एवं राष्ट्रिय स्वतन्त्र पार्टी (रास्वपा)का सभापति रवि लामिछानेलाई बयानका लागि मंगलबार चितवन लगिएको छ ।
पोखराको सूर्यदर्शन सहकारीको रकम अपचलन गरेको आरोपमा कात्तिक २ गते काठमाडौंबाट पक्राउ परेका उनको जिल्ला सरकारी सरकारी वकिलको कार्यालय चितवनमा बयान जारी छ । लामिछानेलाई काठमाडौंबाट बुद्ध एयरको जहाजमार्फत चितवन लगेर बयानका लागि सरकारी वकिलको कार्यालय पुर्याएको थियो ।
चितवनमा साहारा सहकारीको रकम अपचलनमा पनि लामिछाने जोडिएका छन् । साहाराबाट ४२ करोड रकम विभिन्न ५ वटा कम्पनीमा गएको प्रहरीले जनाएको छ । १० करोड ८० लाख गोर्खा मिडिया नेटवर्कमा गएको थियो ।
लामिछानेलाई बुटवलको सुप्रिम सहकारी र काठमाडौंको स्वर्णलक्ष्मी सहकारीको बचत अपचलन गरेको आरोपमा समेत बयान लिइसकिएको छ । उनलाई चितवन पुर्याएपछि समर्थकले नाराबाजी र प्रदर्शन गरेका थिए । त्यस क्रममा प्रहरी र प्रदर्शनकारीबीच धकेलाधकेल भएको थियो ।
पीडितहरुले लामिछानेसहित १० जनाविरुद्ध मंसिर ५ गते चितवन प्रहरीमा पुरक जाहेरी दिएका थिए । मंसिर ७ गते चितवनबाट पक्राउ पुर्जी जारी भएको थियो । चितवन लामिछानेको निर्वाचन क्षेत्र भएको जिल्ला पनि हो ।
साहाराकै रकम अपचलन गरेको आरोपमा नेपाल प्रहरीका पूर्वडीआईजी छविलाल जोशी र नेचर हव इन्टरनेशनल प्रा.लिका रामबहादुर खनालसँग बयान लिइसकिएको छ । उनीहरुसँग आइतबार र सोमबार बयान लिइएको हो ।

























