
विराटनगर । नेपाली कांग्रेस सभापति शेरबहादुर देउवाले प्रधानमन्त्री केपी शर्मा ओलीले राम्रो काम गरिरहेको बताएका छन् । स्थायित्वका लागि कांग्रेस एमालेको गठबन्धन बनेको बताउँदै उनले प्रधानमन्त्री ओलीले राम्रो काम गरेको बताए । ओलीजीसित हामीले स्थायित्वका लागि सरकार बनाउनु परेको हो । दुई वटा पार्टी मिल्दा स्थायित्व हुन्छ,’उनले भने ।
उनले चीन भ्रमणमा भएको सम्झौताका विषयमा प्रधानमन्त्री ओलीलाई बधाई ज्ञापन पनि गरे । ‘ झुट बोल्ने कुरा छैन, ओलीजीले राम्रो काम गर्दै हुनुहुन्छ,’ उनले भने,‘ मित्र राष्ट्र चीनको भ्रमणका क्रममा निकै नै महत्वपूर्ण कुरा गरेर आउनुभएको छ ।’
देउवाले कुनै देशबाट नेपालले ऋण नलिने बताए । उनले पार्टीलाई दह्रो बनाउनका लागि ग्रास रुटमा रहेर काम गर्नुपर्ने बताए ।
गगनलाई जवाफ : धेरै बोल्नेले आफूलाई सिध्याउँछन्
सभापति शेरबहादुर देउवाले महान्त्री गगन थापाप्रति लिक्षित गर्दै धेरै बाेल्नेले आफूलाई सिध्याउने बताएका छन् । सम्मेलनमा थापाले सभापति शेरबहादुर देउवालाई कम बोल्नु हुन्छ भन्दै सम्बाेधन गरेका थिए । जवाफमा देउवाले भने,‘बढी बोल्नेले आफुलाई सिध्याउँछ ।’ देउवाले यसो भन्दा हलमा हाँसो गुन्जिएको थियो । त्यसपछि देउवाले भने,‘मैले ठट्टा मात्रै गरेको ।’

























