
विराटनगर । संघीय संसदको सार्वजनिक लेखासमितिका सभापति ऋषिकेश पोखरेललाई राजीनामा दिन नेकपा माओवादी केन्द्र कोशी प्रदेश संसदीय दलले आग्रह गरेको छ ।
पोखरेल पत्नी अञ्जला कोइराला मोरङको उमागौरी कृषि सहकारी संस्थाको ठगी प्रकरणमा जोडिएकी छन् । कोइरालासहित २६ जनाविरुद्ध मुद्दा दर्ता भइसकेको छ ।
पोखरेल सार्वजनिक लेखासमितिको सभापति भएकै कारण सहकारी ठगीको छानबिन प्रभावित भएको भन्दै माओवादी केन्द्र कोशी प्रदेश संसदीय दलका नेता इन्द्रबहादुर आङ्बोले पोखरेललाई राजीनामा दिन आग्रह गरे ।
माओवादी दलका नेता आङ्बोले विहीबार पत्रकार सम्मेलन गर्दै नैतिकताका आधारमा राजीनामा दिएर अनुसन्धानका लागि सहजीकरण गर्न आग्रह गरे ।
‘पक्राउ पुर्जी जारी भएपनि प्रहरीले पक्राउको कुनै प्रक्रिया अघि बढाएन्, यो विषय धेरै गम्भीर छ,’ उनले भने,‘ सार्वजनिक लेखासमिति सभापतिमाथि नैतिक प्रश्न उठ्यो, उहाँले सभापतिबाट राजीनामा दिदा राम्रो हुन्छ ।’

























