
विराटनगर । कोशी प्रदेशका भौतिक पूर्वाधार विकास मन्त्री भुपेन्द्र राईले एक सय दिने प्रगति सार्वजनिक गरेका छन् । आइतबार मन्त्रालय सम्हालेको एकसय दिने प्रगति सार्वजनिक गरेका हुन् ।
मन्त्री राइले नीतिगत सुधार गर्नुका साथै ‘जहाँ रुग्ण आयोजना त्यहाँ मन्त्री’ भन्ने नारा दिएर अपेक्षित प्रगति हुन नसकेका आयोजनाहरुको अनुगमन गरेको बताए । स्थलगत रुपमा सार्वजनिक सुनुवाई गरेर समस्या समाधान गरी आयोजनाहरुको काम सञ्चालन भैरहेको उनको भनाई छ ।
प्रदेश भित्र प्रयोग बिहीन अवस्थामा रहेका झोलुंगे पुललाई स्थान्तरण गर्ने प्रक्रिया पन सुरु गरेको बताए ।
प्रदेश सरकारका रणनीतिक सडक संजाल पहिचान र वर्गीकरणका लागि प्रदेश सार्वजनिक सडक ऐन २०७७ को मापदण्ड अनुसार प्रादेशिक सहायक लोकमार्ग अन्तरगत ९६ वटा सडक (३१६३.५८ किलोमिटर) र प्रादेशिक मार्ग २८९ वटा (५८१५.५० किलोमिटर) सडक प्रादेशिक सडक सञ्जाल सूची तयार गरी सोही अनुसार निर्माण गर्ने बताए ।
कोशी प्रदेश सरकारको महत्वपूर्ण आयोजना कोशी रिफ्रेसमेन्ट सेन्टरलाई प्रदेश सरकारको बजेटले मात्र सञ्चालन गर्न कठिन भएकोले नीजि क्षेत्रलाई हस्तान्तरण गर्न प्रदेश लगानी सम्मेलन २०८१ को आयोजना सोकेशमा राख्ने मन्त्रीपरिषदले निर्णय गरेको उनले बताए ।
अनुगमनपछि धरान जोड्ने दुई सडक कालोपत्रे गर्ने कार्य अगाडि बढेको उनले बताए । प्रदेश सरकारको सबै भन्दा लामो सडक पुल खोटाङ जिल्ला जन्तेढुङ्गा –१ देवस्थान स्थित बुवा खोला पक्की पुलको २०८१ कार्तिक ६ गते शिल्यान्यास गरी काम सुरु गरेको उनले बताए ।
प्रदेश भवन ऐन २०७६ लाई संसोधन गर्न बनेको बिधेयक २०८१ को प्रारम्भिक संसोधन मस्यौदा तयार गरी आन्तरिक मामिला तथा कानून मन्त्रालयमा रायका लागि पेश गरेको उनले बताए ।

























