
विराटनगर । मोरङको ग्रामथान गाउँपालिकाका नवनिर्वाचित अध्यक्ष र प्रमुख प्रशासकीय अधिकृतबीच विवाद बढेकाे छ ।
अध्यक्ष नमोनारायण माझी र प्रमुख प्रशासकीय अधिकृत रामराज पौडेलबीच प्रहरीलाई लेखेकाे पत्रकाे विषयमा विवाद भएकाे हाे । विवाद बढेपछि अध्यक्ष माझीले पाैडेललाई स्पष्टीकरण पत्र नै काटेका छन् ।
गैरकानुनी उत्खनन् रोक्न सहयोग माग्दै प्रहरीलाई पत्र लेखेका प्रमुख प्रशासकीय अधिकृत रामराज पौडेलसँग पालिका प्रमुख नमोनारायण माझीले स्पष्टीकरण सोधेका हुन् ।
माझी गत उपनिर्वाचनमा माओवादी केन्द्रबाट विजयी भएका थिए । माझीले प्रहरीलाई पत्र लेख्नुपर्ने कारणबारे पाैडेलसँग स्पष्टीकरण मागेका हुन् ।
प्रमुख प्रशासकीय अधिकृत पौडेलले पुस ८ मा ग्रामथानकै झोराहाटमा रहेको प्रहरी कार्यालयलाई लेखेको पत्रमा भनिएको छ,‘ग्रामथान गाउँपालिका वडा नं.२ अन्तर्गतका विभिन्न नहर, सडक लगायतका सार्वजनिक स्थलबाट गैरकानूनी रूपले माटो उत्खनन् भइरहेको भन्ने जनगुनासो आएको तथा गाउँपालिकाबाट अनुगमन गर्दा समेत उत्खनन् भएको पाइएकोले त्यस प्रकारको गैरकानूनी उत्खनन् कार्य रोकी उत्खनन् कार्यमा संलग्न सवारीसाधनहरू नियन्त्रणमा लिई दिनुहुन अनुरोध छ।’
पुस ११ मा अध्यक्ष माझीले प्रहरीलाई पत्र किन लेखेको भन्दै प्रशासकीय अधिकृतलाई स्पष्टिकरण सोधेका हुन् । अध्यक्षले मागेको स्पष्टीकरण पत्रमा भनिएको छ, ‘यस ग्रामथान गाउँपालिकाबाट मिति २०८१–०९–०८ गतेको दिन चं. नं. १०१५, मिति २०८१–०९–०८ को गैरकानूनी उत्खनन् कार्य रोक्का गर्ने सम्बन्धमा प्रहरी चौकी, झोराहाटलाई काटिएको पत्र के–कति कारणले काटिएको हो ? स्पष्ट खुलाई दिन हुन जानकारीको लागि अनुरोध छ।’
पालिकाले सहयाेग माग्नुअघि पालिका उपाध्यक्ष, वडाध्यक्षसहित जनप्रतिनिधिको टोलीले अनुगमन गरेको थियो। अनुगमनका क्रममा जथाभावी उत्खनन् गरेको भेटिएको थियो ।
गाउँपालिका अध्यक्ष माझीले नहर र पैनी छेउमा अवैध उत्खनन् भएको विषयमा आफ्नो विमति नभए पनि आफू काठमाडौं भएका बेला प्रहरीलाई पत्र काटिएको र त्यसबारे जानकारी नदिएकाले स्पष्टीकरण मागेको बताएका छन् ।

























