
काठमाडौं । पूर्वप्रहरी महानिरीक्षक सर्वेन्द्र खनाल सत्तारुढ नेकपा (एमाले)बाट अलग भएका छन् । नेपाल प्रहरीका पूर्वप्रमुख खनालले एमाले परित्याग गरेका हुन् ।
एमालेबाट दुई पटकसम्म टिकट लिएर चुनाव लडेका उनले सामाजिक सञ्जाल फेसबुकमार्फत कुनै पार्टीसँग आबद्ध नरहेको उल्लेख गरेका छन् । ‘हजुरहरुलाई मेरो राजनीतिक स्थितिबारे अन्योलमा परेको महसुस गरेर म यसै माध्यमबाट स्पष्ट पार्न चाहन्छु कि म अहिले कुनै पनि राजनीतिक पार्टीसँग आबद्ध छैन,’ खनालले लेखेका छन् ।
आफूले स्वतन्त्र रुपमा स्थानीय र राष्ट्रिय समस्या समाधानका लागि काम गरिरहेको दाबी उनको छ । ‘राष्ट्रघाती दोषीहरुलाई कानुनी कठघरामा पुर्याउन र हाम्रो राष्ट्रलाई महान् बनाउन मेरो सम्पूर्ण प्रयास जारी रहनेछ । म देश र जनताको हितका लागि सधैँ लडिरहनेछु,’ खनाल भन्छन् ।
यसअघि एमालेबाट टिकट पाएर दुई पटकसम्म प्रतिनिधिसभा सदस्यमा चुनाव लडेका उनी पछिल्लो समय पार्टीमा निष्कृय थिए । एमालेबाट निष्कृय भइसकेको र नयाँ बाटोका बारेमा सोचिनसकेको खनालको भनाइ छ ।
खनाल २०७४ चैतदेखि २०७६ माघसम्म नेपाल प्रहरीको प्रमुख (आईजीपी) थिए । सेवाबाट अवकाश पाइसकेपछि उनी २०७९ असोज ६ गते औपचारिक हिसाबले एमाले प्रवेश गरेका हुन् । पार्टी अध्यक्ष केपी शर्मा ओलीले एमाले प्रवेश गराएको २ महिनामै उनले काठमाडौंको निर्वाचन क्षेत्र नम्बर ६ बाट प्रतिनिधिसभा सदस्यको टिकट पाए ।
उक्त क्षेत्रबाट राष्ट्रिय स्वतन्त्र पार्टी (रास्वपा)का शिशिर खनाल १४ हजार २ सय ४ मत ल्याएर निर्वाचित हुँदा खनाल निकटतम प्रतिद्वन्द्वी बने । खनालले ८ हजार ९ सय ११ र तेस्रो स्थानमा रहेका नेपाली कांग्रेसका भीमसेनदास प्रधानले ८ हजार ८ सय ५ मत पाएका थिए ।
उपनिर्वाचनमा पनि तनहुँ निर्वाचन क्षेत्र नम्बर १ बाट खनालले टिकट पाए । त्यहाँबाट पनि रास्वपा नेता स्वर्णिम वाग्लेले ३४ हजार ९ सय १९ मतसहित विजयी भएका थिए । निकटतम प्रतिद्वन्द्वी नेपाली कांग्रेसका गोविन्द भट्टराईले २० हजार १ सय २२ र तेस्रो भएका एमाले उम्मेदवार खनालले ८ हजार ४ सय ८८ मत प्राप्त गरे ।

























