
विराटनगर । नेकपा (एमाले)बाट कारबाहीका परेका नेता डा. भीम रावलले आफू कुनै दलमा नलागी नयाँ वैकल्पिक शक्ति निर्माणमा लागेको बताएका छन् ।
एमालेबाट निकालिएपछि देश दौडाहमा रहेका नेता डा. रावलले आइतबार विराटनगरमा पत्रकार सम्मेलन गरी वैकल्पिक शक्ति निर्माणमा जुटिसकेको बताएका हुन् । अहिले देशमा रहेका कुनै पनि पार्टीमा आफू नलाग्ने बरु देशभक्तहरूको नयाँ पार्टी गठनमा जुटिसकेको उनले बताए ।
नयाँ पार्टी कहिले घोषणा गर्ने भन्ने विषयमा कुनै टुंगो नभए पनि हाल मातृभूमि जागरण अभियानमा जोडेर देशैभर संगठन निर्माणमा जुटेको बताउँदै, डा. रावलले भने, ‘हाललाई सम्पूर्ण देशभक्तहरूलाई मातृभूमि जागरण अभियानमा समेटेर देशैभर संगठन निर्माण गर्दै लैजाने र उपयुक्त समयमा पार्टीमा रुपान्तरण गर्ने गरी अघि बढ्ने छु ।’
डा. रावलले अब कम्युनिष्ट पार्टी नभई सबैलाई समेट्ने पार्टी गठन गर्ने तयारी रहेको बताए । दक्षिण पन्थी वामपन्थी भनेर कित्ताकाट गर्ने तर, आफ्नो स्वार्थमा जुन–जुन पार्टीसँग पनि मिल्ने र पदमा पुग्ने प्रवृत्ति उचित नभएको उनले बताए ।
केपी ओलीहरूले कांग्रेससँग, जनमतसँग मिलेर प्रधानमन्त्री हुन हुने मैले चाहिँ देशको हितमा देशभक्तहरूलाई समेट्न नहुने भन्ने हुँदैन भन्दै, डा. रावलले भने, ‘अहिलेका दलहरूको विकल्पका रुपमा वैकल्पिक शक्ति निर्माणका लागि अघि बढेकाले अब, वामपन्थी, दक्षिणपन्थी भनेर घोषणा गर्ने छैन ।’

























