
काठमाडौं । नेकपा माओवादी केन्द्रको केन्द्रीय समिति बैठकमा सोमबार ८० जना केन्द्रीय सदस्यले आफ्नो धारणा राखेका छन् ।
आइतबारबाट सुरु बैठकमा अध्यक्ष पुष्पकमल दाहाल प्रचण्डले प्रस्तुत गरेको राजनीतिक प्रतिवेदनमाथि सोमबार ८० जना सदस्यले धारणा राखेका हुन् । धारणा राख्ने क्रममा नेताहरुले अध्यक्ष प्रचण्डलाई पनि महिनामा तीन दिन उत्पादन मुलक कार्यमा खटिन आग्रह गरेका छन् ।
उपाध्यक्ष एवं प्रवक्ता अग्निप्रसाद सापकोटाका अनुसार केन्द्रीय सदस्यहरुले सबै नेतालाई उत्पादनमा जोड्नु पर्ने धारणा राखेका हुन् ।
‘अध्यक्षसहित सबै नेता कार्यकर्ताहरू श्रम र उत्पादनमा जोडिनुपर्छ भन्ने छ,’ उनले भने,‘ कम्तिमा महिनामा तीनपटक अध्यक्ष पनि खटिनुपर्ने प्रस्ताव आएको छ ।’
बैठकमा पार्टीका विभागहरूलाई प्रभावकारी बनाउने कुरा उठेको उनले बताए । उनका अनुसार भोलि पनि केन्द्रीय सदस्यहरुले धारणा राख्नेछन् ।

























