
काठमाडौं । संसद छलेर सरकारले ल्याएको अध्यादेश अस्वीकार गर्ने विपक्षी दलहरुले निर्णय गरेका छन् । संघीय संसदको हिउँदे अधिवेशन शुक्रबारबाट सुरु हुँदैछ ।
बिहीवार प्रमुख प्रतिपक्ष दल नेकपा माओवादी केन्द्रको संसदीय दलको कार्यालयमा बसेको विपक्षी दलहरुको संयुक्त बैठकले अध्यादेश अस्विकार गर्ने निर्णय गरेको हो ।
बैठकपछि माओवादी केन्द्रका प्रमुख सचेतक हितराज पाण्डेले गलत विधि र प्रक्रियामार्फत अध्यादेश ल्याएका कारण अस्वीकार गर्ने निर्णय भएको जानकारी दिए ।
‘सरकारले सदन बोलाउने बेलामा जसरी अध्यादेश ल्याएको छ, यो प्रक्रियाको हिसाबले पनि बेठिक छ, ’ उनले भने,‘विधि, प्रक्रियाको हिसाबले छिटो गर्ने भन्ने छ त्यसमा बेठिक भयो । त्यसको अस्वीकार गर्नुपर्छ भन्ने सर्वसम्मत निर्णय भएको छ ।’

























