पूर्वराष्ट्रपतिको विराटनगर बसाइ : सार्वजनिक कार्यक्रमको ‘सेड्युल’, राजनीतिक भेटघाटमा व्यस्त

Share this
707shares
मुलुकी खबर
मुलुकी खबर
clock२०८१ माघ २२, मंगलबार २०:२५

विराटनगर । पूर्वराष्ट्रपति विद्यादेवी भण्डारी १ साता विराटनगर बसेर काठमाडौं फर्किएकी छन् । माघ १४ गते विराटनगर आइपुगेकी उनी आइतबार मात्रै काठमाडौं फर्किन् ।

भण्डारी केही सार्वजनिक कार्यक्रमको ‘सेड्युल’सहित आएकी थिइन् । तर, १ साता बसाइका क्रममा उनले राजनीतिक भेटघाटलाई बढी प्राथमिकतामा राखिन् । अधिकांश समय भेटघाटमै बिताइन् ।

एमाले नेताहरुसँगको अनौपचारिक भेटघाटमा उनको स्पष्ट सन्देश थियो, ‘खोपीको देउता’ मात्रै भएर बस्दिन’ । अर्थात राजनीतिक भेटघाटमा व्यस्त रहेकी उनी पूर्वराष्ट्र प्रमुखको भूमिकामा मात्रै नबस्ने सन्देश प्रवाह गरेर काठमाडौं फर्किएकी हुन् । माघ १९ गते वामबुद्धिजिवीसँगको भेटमा पनि उनले यही आशय व्यक्त गरिन् ।

हुन त २ पटकसम्म मुलुकको राष्ट्रपति भइसकेकी भण्डारी सम्मानित हिसाबले बस्नुपर्नेमा पदको लोभका लागि राजनीतिमा आउन लागेको टिप्पणी कतिपयले गर्ने गरेका छन् । राजनीतिको पाइला अघि बढाउने भन्दा पनि सम्मानित नागरिकको हैसियतले अभिभावकीय भूमिकामा बस्नुपर्ने सुझाव कतिपयले दिइरहेका छन् । सक्रिय राजनीतिमा उनको खाँचो नरहेको विश्लेषण गर्नेहरु पनि छ ।

तर, विभिन्न आलोचना र टिप्पणीलाई बेवास्ता गर्दै उनी सक्रिय राजनीतिमा आउन मरिहत्ते गरिरहेकी छन् । पूर्वराष्ट्रपति भण्डारीलाई यतिबेला सक्रिय राजनीतिमा आउन निक्कै धपेडी छ ।

विराटनगर बस्दा बिग होटलमा ‘भेटघाटको मुकाम’ बनाएकी उनलाई भेट्न प्रतिनिधिसभाका सभामुख देवराज घिमिरेदेखि नेपाली कांग्रेसका नेता एवं पूर्वमन्त्री ज्ञानेन्द्रबहादुर कार्कीसम्म पुगे । नेकपा (एमाले) मोरङका पूर्वअध्यक्ष एवं नेकपा (एकीकृत समाजवादी) पार्टीका पोलिटब्युरो सदस्य महेश रेग्मी पनि उनलाई भेट्न पुगे ।

भण्डारीले विराटनगरको महेन्द्र मोरङ क्याम्पसबाट विद्यार्थी राजनीति गरेकी थिइन् । २०४०–०४१ को स्ववीयू कोषाध्यक्षसमेत रहेकी उनले आफ्ना समकालीन तथा आफूपछिका विद्यार्थी नेताहरुलाई भेटिन् । उनले विराटनगरमा आफ्ना पूर्वघरबेटीलाई पनि भेटेकी थिइन् ।

राष्ट्रपतिको कार्यकाल सकिएपछि केही समय निष्क्रिय भएकी भण्डारीले राजधानी बाहिर बसेर राजनीतिक ‘होमवर्क’ गरेको विराटनगर नै हो । उनको सक्रिय राजनीतिको सुरुवात पनि विराटनगरबाटै भएको थियो । विक्रम संवत २०३० को दशकमा भोजपुरबाट विराटनगर आएर उनले विद्यार्थी राजनीति सुरु गरेकी थिइन् ।

दुई कार्यकाल राष्ट्रको प्रथम नागरिक भएकी उनले फेरि राजनीतिक जीवनकै अर्काे अध्यायको सक्रियताका लागि पनि आधार इलाका नै रोजेको कतिपयको बुझाइ छ । विराटनगरको भेटघाट राजनीतिको सुरुवात भएको उनीनिकट नेताहरु बताउँछन् ।

भण्डारीको ‘मुभमेन्ट’लाई नजिकबाट हेरेका एमालेका एक नेता भण्डारीले तत्कालै केपी शर्मा ओलीलाई चिढ्याएर भने अघि बढ्न नचाहेको बताउँछन् । तर, परिस्थिति हेरेर अघि बढ्ने उनको योजना छ । विराटनगरमा पत्रकार भेटघाट गरेर ‘देशले आवश्यकता महसुस गरे’ राजनीतिमा आउँछु भनेर स्पष्ट सन्देश दिएकी थिइन् ।

आफू सक्रिय राजनीतिमा आउँदा वाम ध्रुवीकरणको वातावरण बन्ने उनको विश्लेषण छ । ‘केपी शर्मा ओलीको स्वभाव र शैलीका कारण वाम ध्रवीकरण उनको नेतृत्वमा सम्भव छैन । तर, उहाँको ठाउँमा विद्या कमरेड आउँदा त्यो वातावरण बन्छ,’ एमालेका ती नेताले भने,‘ विद्या कमरेडप्रति नेकपा (माओवादी केन्द्र) र नेकपा (एकीकृत समावादी)को नेतृत्व ‘सफ्ट’ छ ।’

उनी राजनीतिमा आउँदा ओलीबाट पेलिएका नेताहरुमा संरक्षण पाउने आश पनि रहेको ती नेताको भनाइ छ । विराटनगरमा रहँदा उनले ओलीबाट पेलिएका नेताहरुसँग पनि भेटघाट गरिन् । पार्टीमा पेलिएका नेताहरुको भेटघाटको वातावरण विनोद ढकालले मिलाएका थिए । ढकाल पनि ओलीबाट पेलिएका नेता हुन् ।

माघ १४ गते विराटनगर आएलगतै पूर्वराष्ट्रपति भण्डारीले महिला अगुवा कार्यकर्तासँग भेटघाट गरिन् । त्यसपछि पत्रकार सम्मेलन गरेर राष्ट्रपति पनि राजनीतिक जिम्मेवारी रहेका कारण आवश्यकता परेको खण्डमा सक्रिय राजनीतिमा आउने बताइन् । त्यसपछि उनले विद्यार्थीसँग भेटघाट गरिन् । पार्टीका जिल्ला र केन्द्रीय तहका नेताहरुसँग छुट्टाछुट्ै छलफल गरिन् ।

माघ १५ गते उनले एमालेनिकट प्राध्यापक संघको टोलीसँग भेटघाट गरिन् । त्यसपछि इटहरीको जनता माध्यमिक विद्यालयको वार्षिकोत्सव कार्यक्रममा सहभागी भइन् । कार्यक्रमपछि इटहरीमै कार्यकर्ता भेला गरेर केही समय छलफल गरिन् । फर्किएर विराटनगर आएपछि पनि केही नेतालाई भेटिन् ।

माघ १६ गते उनी मनमोहन प्राविधिक विश्वविद्यालय र प्रतिष्ठानको अवलोकनमा गइन् । त्यसपछि स्मृति बोर्डिङ स्कुलमा आयोजित कार्यक्रममा सहभागी भइन् । फर्किएर उनले स्थानीय नेताहरुसँग भेटघाट गरिन् ।

माघ १७ गते गते बिहान कोशी प्रदेशका मुख्यमन्त्री हिक्मतकुमार कार्कीसँग भेटघाट गरिन् । त्यसपछि मदन भण्डारी ट्रमा सेन्टर उर्लाबारी र मदन भण्डारी स्मृति प्रतिष्ठानको अवलोकनतर्फ लागिन् । सोही क्रममा मामालाई भेट्न पनि पुगिन् । विराटनगर आएर उनले महेन्द्र मोरङ आदर्श बहुमुखी क्याम्पसका पूर्वविद्यार्थीसँग छलफल गरिन् । त्यो छलफलमा महेन्द्र मोरङबाट विद्यार्थी राजनीति सुरु गरेका एमाले र कांग्रेसका नेताहरु सहभागी थिए ।

माघ १८ गते आदिवासी जनजाति समुदायका अगुवा नेताहरुसँग भेटघाट गरिन् । त्यसपछि सरस्वती माध्यमिक विद्यालय झोराहाटको कार्यक्रममा सहभागी भइन् । सोही दिन उनी इन्जिनियरिङ क्याम्पस धरानमा विद्यार्थीको भेलालाई सम्बोधन गर्न पुगिन् । धरानमा पनि कार्यकर्ता भेला गरेर छलफल गरिन् ।

माघ १९ गते उनको निर्धारित कार्यक्रम एनटिभी इटहरीको वार्षिकोत्सव मात्रै थियो । कार्यक्रममा सहभागी भएर उनी विराट एक्स्पो अवलोकनका लागि पुगिन् । सोही दिन संघीय संसदका सभामुख देवराज घिमिरेसँग बिग होटलमा भेटघाट गरिन् । माघ १९ गते नै उनले कांग्रेस नेता ज्ञानेन्द्रबहादुर कार्कीसँग लामो संवाद गरिन् । त्यसपछि मदन भण्डारी फाउन्डेशन प्रदेशको टोलीसँग छलफल गरिन् ।

उनले पूराना कार्यकर्ता र पूर्वघरबेटीसँग पनि भेटघाट गरिन् । १९ गते नै उनले वामबुद्धिजिवीसँग छलफल गरेकी थिइन् । माघ २० गते पनि पार्टीका नेताहरुसँग छलफल भएको थियो ।

विराटनगरमा भण्डारीको सचिवालय हेरेका एमाले मोरङका सहसचिव सोमराज थापाका अनुसार भण्डारीले झापा, मोरङ र सुनसरीका नेताहरुसँग अनौपचारिक छलफल गरेकी थिइन् । ‘पूर्वनिर्धारित कार्यक्रमबाहेक उहाँले समाजका विभिन्न पक्षसँग छलफल गर्नुभयो,’ थापा भन्छन्, ‘विराटनगरबाट सकारात्मक भएर फर्कनु भएको छ ।’

तपाइको प्रतिक्रिया
विराटनगरबाट लागुऔषधसहित एक युवक पक्राउ
ब्राउन सुगरसहित इटहरीका दुई युवक पक्राउ
कोशी प्रदेशमा एकै दिन १७ सवारी दुर्घटना, २३ जना घाइते (पूरा विवरणसहित)
बराहक्षेत्रमा चलिरहेको मोटरसाइकलबाट खसेकी युवतीको उपचारका क्रममा मृत्यु
कोशी र गण्डकीका हिमाली क्षेत्रमा वर्षा र हिमपातको सम्भावना
स्थानीय निर्वाचनको तयारीमा एमाले, ३ हजार ४१४ नेता–कार्यकर्तासहितको राष्ट्रिय भेला
यस्तो छ विदेशी मुद्राको विनिमय दर
यस्तो छ विदेशी मुद्राको विनिमयदर
पटकाको बारुद चुलोमा हाल्दा जलेर सुनसरीका बालक घाइते
अस्पतालको आशामा जग्गा दिए, नबनेपछि मुख्यमन्त्री कार्यालय अगाडि आमरण अनशन
भुटानी शरणार्थी र राजनीतिक बन्दीको विषय उठाउन आग्रह
भन्सार छली सुन लैजान खोज्ने चिनियाँ नागरिक पक्राउ
© 2024 Muluki Khabar. All Rights Reserved. Design & Develop By: Indesign Media Pvt. Ltd.