गणतन्त्र पक्षधर र राजावादीले आज काठमाडौंमा प्रदर्शन गर्दै

Share this
672shares
मुलुकी खबर
मुलुकी खबर
clock२०८१ चैत १५, शुक्रबार ०७:०५

काठमाडौं । गणतन्त्र पक्षधर र राजवादीले आज (शुक्रबार) काठमाडौंका अलगअलग स्थानमा प्रदर्शन गर्दैछन् । गणतन्त्रवादीका तर्फबाट वर्तमान व्यवस्थाको पक्षमा समाजवादी मोर्चाले प्रदर्शन गर्ने छ ।

राजवादीका तर्फबाट अहिलेको व्यवस्थाविरुद्ध पूर्वराजाका समर्थकले प्रदर्शन गर्ने छन् । परस्पर विरोध २ पक्षको प्रदर्शनमा एकअर्काको भेट हुन नदिने नीति अख्तियार गर्दै स्थानीय प्रशासनले सुरक्षा व्यवस्था कडा पारेको छ ।

प्रदर्शनका क्रममा कुनै पनि अप्रिय घटना हुन नदिन त्यही हिसाबको सुरक्षा व्यवस्था मिलाइएको हो । ठूलो संख्यामा सुरक्षाकर्मी परिचालन गरिएको छ । प्रदर्शनका क्रममा राजावादीलाई चक्रपथ (रिङरोड) प्रवेश गर्न नदिने र गणतन्त्र पक्षधरलाई चक्रपथभित्र सीमित गर्ने रणनीति प्रशासनको छ ।

स्थानीय प्रशासनले गणतन्त्र पक्षधर समाजवादी मोर्चालाई भृकुटीमण्डपमा र राजावादीलाई तीनकुने क्षेत्रमा प्रदर्शन गर्न अनुमति दिएको छ । समाजवादी मोर्चाको भक्तपुरतिरबाट आउने समर्थक सवार गाडीलाई प्रहरीले ‘डाइभर्सन’ गरेर कोटेश्वरबाट बालकुमारीतर्फ पठाउने छ ।

मोर्चाले बबरमहलबाट माइतीघर र त्रिपुरेश्वर हुँदै प्रदर्शनीमार्गसम्म जुलुस निकाल्न सक्ने छ । कुपण्डोलमा भेला हुने मोर्चाका समर्थक त्रिुपरेश्वरबाट घुमेर प्रदर्शनीमार्ग पुग्नेछन् । जिल्ला सुरक्षा समितिले सोह्रखुट्टेबाट पकनाजोल र जमल हुँदै त्रिचन्द्रतर्फ जुलुस निकाल्न मोर्चालाई अनुमति दिएको छ ।

त्यस्तै, राजावादीको कलंकीतर्फबाट निस्किने जुलुस बल्खु, सातदोबाटो, ग्वार्को, कोटेश्वर हुँदै तीनकुने पुग्ने छ । भक्तपुरतर्फबाट सुरु हुने जुलुस कोटेश्वर हुँदै तीनकुने र अर्को जुलुस जोरपाटी, बौद्ध, चाबहिल, गौशाला, एयरपोर्ट हुँदै तीनकुने पुग्ने छ । जुलुस निकालेर गोंगबु, सामाखुशी क्षेत्रबाट चाबहिल हुँदै तीनकुने पुग्ने गरी राजावादीका लागि ‘रुट’ तय गरिएको छ ।

दुवै पक्षको जम्काभेट र मुठभेडको स्थितिलाई रोक्न प्रशासनले विशेष रणनीति अपनाएको छ । समाजवादी मोर्चामा नेकपा (माओवादी केन्द्र), नेकपा (एकीकृत समाजवादी), नेपाल समाजवादी पार्टी र विप्लव नेतृत्वको नेकपा आबद्ध छन् ।

मेडिकल व्यवसायी दुर्गा प्रसाईं नेतृत्वको ‘राष्ट्र, राष्ट्रियता, धर्म, संस्कृति र नागरिक बचाउ महाअभियान’को ब्यानरमा तीनकुनेमा गर्न लागिएको प्रदर्शनमा अन्य राजावादी दल पनि जोडिने भएका छन् । नवराज सुवेदी नेतृत्वको ‘राजसंस्था पुनःस्थापनाका लागि संयुक्त जनआन्दोलन समिति’ले प्रसाईंसँगै मिलेर प्रदर्शन गर्ने बताइसकेको छ । सुवेदी नेतृत्वको समितिले शुक्रबारको प्रदर्शनको कमान्डर नै प्रसाईंलाई तोकेको छ ।

संयुक्त जनआन्दोलन समितिले १ साताभित्र आफ्ना शान्तिपूर्ण आग्रहलाई स्वीकार गर्न अल्टिमेटम दिएको छ । संयुक्त जनआन्दोलन समितिका संयोजक सुवेदीले शान्तिपूर्ण आग्रहलाई बेवास्ता गरेको खण्डमा आन्दोलनलाई चैत २१ गतेदेखि थप सशक्त बनाउँदै लैजाने घोषणा गरेका छन् ।

उक्त समितिले २०४७ सालको संविधानमा टेकेर नवीन समझदारीमा आउन गणतन्त्रवादी दलहरूलाई आह्वान गरेको छ । २०७२ सालको संविधानमा रहेका सकारात्मक प्रावधानलाई समेट्दै २०४७ सालको संविधानलाई आधार मानेर प्रमुख राजनीतिक पक्षहरूबीच सहमति बन्नुपर्ने चाहना राजावादीको छ ।

राप्रपाले पनि केन्द्रीय कार्यसम्पादन समिति बैठकबाट अध्यक्ष राजेन्द्र लिङ्देन नेतृत्वमै राजसंस्था पुनःस्थापनाका लागि आन्दोलन गर्ने निर्णय गरिसकेको छ । चैत १२ गते आन्दोलन परिचालन मूल समिति बैठक गरेर राप्रपाले चैत २६ गते काठमाडौंमा प्रदर्शन गर्ने र वैशाख ७ देखि काठमाडौंकेन्द्रित आन्दोलन गर्ने घोषणा गरिसकेको हो ।

राप्रपाले राजसंस्था पुनःस्थापनाका लागि हुने सबै खालका आन्दोलनलाई समर्थन गर्ने निर्णयसमेत गरिसकेको छ । राप्रपाले समान उद्देश्य र विचार भएका राजनीतिक दल, संयुक्त जनआन्दोलन समिति, विभिन्न संघ संगठनहरूसँग सहकार्य, कार्यगत एकता वा मोर्चा गठन गरी आन्दोलनका कार्य अघि बढाइने निर्णय गरेको थियो ।

उपत्यका प्रहरी कार्यालय रानीपोखरीले काठमाडौं प्रहरी प्रमुख एसएसपी विश्व अधिकारीको नेतृत्वमा प्रहरी खटाउने भएको छ । प्रदर्शनस्थलमा भने एसपी अपिलराज बोहराको नेतृत्वमा प्रहरी रहने छ । आवश्यकता अनुसार ‘कमान्ड सेन्टर’ र ‘फिल्ड’को सुरक्षा व्यवस्था मिलाइने छ ।

सुरक्षा अवस्था मजवुत बनाउन सशस्त्र प्रहरी पनि ठूलो संख्यामा परिचालन गरिएको छ । सूचना संकलनका लागि राष्ट्रिय अनुसन्धानलाई पनि खटाइने छ । प्रदर्शनका क्रममा हुनसक्ने सम्भावित अवैध गतिविधि एवं घुसपैठ नियन्त्रण गर्न सादा पोसाकमा समेत सुरक्षाकर्मी खटाइएको छ ।

प्रदर्शनका क्रममा राजावादीबाट सुरक्षाका सबालमा केही चुनौती हुनसक्ने विश्लेषण सुरक्षा निकायको छ । सुरक्षा निकायले राजावादी समूहलाई बढी निगरानीमा राख्ने छन् । राजावादीका गतिविधि करिब १ सातादेखि सुरक्षा निगरानीमा छन् ।

राष्ट्रिय स्वतन्त्र पार्टी (रास्वपा) भने दुवै पक्षको प्रदर्शनमा सहभागी नहुने भएको छ । वर्तमान सरकारको विरोधमा हुने जुनसुकै शान्तिपूर्ण कार्यक्रममा आफ्नो पार्टी र नेतृत्वको सहभागिता एवं ऐक्यबद्धता हुने रास्वपाको भनाइ छ । तर, शुक्रबारको दुवै प्रदर्शन सरकार विरोधी भन्दा पनि व्यवस्थाको पक्ष र विपक्षमा भएकाले सहभागी नहुने रास्वपाले जनाएको छ ।

तपाइको प्रतिक्रिया
कोशी र गण्डकीका हिमाली क्षेत्रमा वर्षा र हिमपातको सम्भावना
स्थानीय निर्वाचनको तयारीमा एमाले, ३ हजार ४१४ नेता–कार्यकर्तासहितको राष्ट्रिय भेला
यस्तो छ विदेशी मुद्राको विनिमय दर
यस्तो छ विदेशी मुद्राको विनिमयदर
पटकाको बारुद चुलोमा हाल्दा जलेर सुनसरीका बालक घाइते
अस्पतालको आशामा जग्गा दिए, नबनेपछि मुख्यमन्त्री कार्यालय अगाडि आमरण अनशन
भुटानी शरणार्थी र राजनीतिक बन्दीको विषय उठाउन आग्रह
भन्सार छली सुन लैजान खोज्ने चिनियाँ नागरिक पक्राउ
खराब मौसमले विराटनगरका बिहानका सबै उडान रद्द, सयौँ यात्रु प्रभावित
इनम सापकोटा प्रकरणमा सरकारको अनुसन्धानमाथि पोखरेलको प्रश्न
कनकाईमा आगजनीबाट दुई कुन्यूको धान र पराल नष्ट
© 2024 Muluki Khabar. All Rights Reserved. Design & Develop By: Indesign Media Pvt. Ltd.